راجہ محمد فاروق حیدرنے کہا ہے کہ انتخابات کا بائیکاٹ کسی صورت نہیں کرینگے۔

سابق وزیراعظم آزادکشمیر و مرکزی نائب صدر مسلم لیگ ن راجہ محمد فاروق حیدر خان نے اپنے ایک بیان میں کہا کہ حکومت کے لیے شدید ترین تحفظات کے باوجود میدان کھلا نہیں چھوڑ سکتے۔

انہوں نے کہا کہ کارکنان دھاندلی کو ووٹ کے ذریعے ناکام بنائیں،اپوزیشن جماعتیں مرحلہ وار انتخابات کو مسترد کرتی ہیں۔

راجہ فاروق حیدر کا کہنا تھا کہ حکومت نے  دھاندلی کا منصوبہ بنایا ہوا ہے ، میری شاہ غلام قادر  چوہدری لطیف اکبر چوہدری  یاسین سردار عتیق احمد خان سے اس سلسلہ میں بات ہوئی ہے۔

ان کا یہ بھی کہنا تھا کہ انتظامیہ پولیس حکومت کی ہے غیر تربیت یافتہ افراد کے ذریعے صاف شفاف انتخابات ممکن نہیں اور یہ سپریم کورٹ کے فیصلے کے بھی خلاف ہے۔

انہوں نے کہا کہ الیکشن کمیشن نے اتنے بڑے فیصلے پر سیاسی جماعتوں سے مشاورت تک نہیں کی، انتخابات کا بائیکاٹ کسی صورت نہیں کرینگے۔

سابق وزیراعظم آزادکشمیر و مرکزی نائب صدر مسلم لیگ ن راجہ محمد فاروق حیدر خان نے مزید کہا کہ مسلم لیگ ن کے کارکنان عوامی حمایت سے حکومتی ہتھکنڈوں کو ناکام بنائیں۔