بیرسٹر سیف نے کہا ہے کہ دنیا بھر میں کھیلوں نے ہمیشہ امن کا راستہ ہموار کیا ہے۔

تفصیلات کے مطابق صوبائی دارلحکومت میں بین الاقوامی امن و کھیل کانفرنس کے دوسرے روز معاون خصوصی اطلاعات خیبرپختونخوا برسٹر سیف نے کانفرنس میں خطاب کرتے ہوئے کہا کہ عالمی امن اور کھیل کانفرنس سے دنیا کو امن کا پیغام گیا ہے جبکہ ہے دنیا بھر میں کھیلوں نے ہمیشہ امن کا راستہ ہموار کیا ہے۔

انہوں نے کہا کہ شہر پشاور دہشتگردی کے مشکل دور سے گزرا ہے، پھولوں کے شہر کو دوبارہ پرامن بنانے میں شہریوں کا اہم کردار ہے جبکہ  خیبرپختونخوا کے عوام امن پسند اور امن کو مقدم رکھتے ہیں۔

ان کا کہنا تھا کہ پشاور میں عالمی امن و کھیل کانفرنس کا انعقاد قابل ستائش ہے، کھیلوں کے ذریعے نوجوانوں کی صلاحیتوں کو مثبت سمت پر ڈالا جا سکتا ہے۔

معاون خصوصی اطلاعات خیبرپختونخواہ برسٹر سیف نے مزید کہا کہ کھیلوں سے نوجوانوں کی پوشیدہ صلاحیتوں کو اجاگر کرنے کا موقع ملتا ہے جبکہ خیبرپختونخوا کی حکومت بھی ہر طرح کے کھیلوں کو فروغ دے رہی ہے۔

اس موقع پر ہنگری، نیپال، سری لنکا، سعودی عرب، آذربائجان کے سپورٹس جرنلسٹس نے بھی کانفرنس میں اظہار خیال کیا۔

کانفرنس میں 9 ملکوں کے 11 سے زائد مندون شریک ہوئے جبکہ پاکستان بھر سے کھلاڑی اور کھیلوں سے تعلق رکھنے والی نامور شخصیات نے بھی کانفرنس میں شرکت کی۔