پاکستان تحریک انصاف (پی ٹی آئی) کے چیئرمین عمران خان کا اسمبلیاں تحلیل کرنے سے متعلق فیصلہ ن لیگ کے گلے کی ہڈی بن گیا۔

ذرائع کے مطابق تحریک عدم اعتماد پیش کریں تو کامیاب نہیں ہو گی اور نہ کریں تو پی ٹی آئی اسمبلیاں تحلیل کر سکتی ہے۔

ذرائع نے بتایا کہ پنجاب اسمبلی کا ایوان 371 ممبران اسمبلی پر مشتمل ہے، اس وقت تحریک انصاف کی اسمبلی میں 180 جبکہ ق لیگ کی 10 نشستیں ہیں۔

ذرائع کا کہنا ہے کہ مسلم لیگ ن کی اسمبلی میں ممبران کی تعداد 167، پی پی 7، آزاد 5 جبکہ راہ حق پارٹی کا 1 رکن ہے، اپوزیشن کی کل ملا کر اسمبلی ممبران کی تعداد 180 بنتی ہے۔

دوسری جانب اسپیکر پنجاب اسمبلی کی جانب سے مسلم لیگ ن کے 18 اراکین پر 15 اجلاسوں میں شرکت پر پابندی عائد ہے اور اس کے بعد اپوزیشن کے پاس اسمبلی منبران کی تعداد 162 رہ جاتی ہے۔

ذرائع نے بتایا کہ چوہدری نثار نے آزاد امیدوار کی حیثیت سے ابھی تک حلف نہیں اٹھایا۔ اسمبلی ممبران نمبرز کے حساب سے اپوزیشن تحریک عدم اعتماد کامیاب نہیں کروا سکتی۔

ن لیگ تحفظات کا شکار ہے کہ تحریک عدم اعتماد کی ناکامی کی صورت میں پرویز الہیٰ کی حکومت آئندہ 6 ماہ کے لیے محوظ ہو جائے گی۔

وزیراعظم نے پارٹی رہنماؤں کا اجلاس طلب کرلیا

دوسری جانب تحریک انصاف کے چیئرمین عمران خان کی جانب سے اسمبلیاں تحلیل کرنے کے فیصلے کے بعد وزیراعظم شہباز شریف نے پارلیمانی پارٹی رہنماؤں کااجلاس طلب کر رکھا ہے۔

ذرائع نے بتایا کہ اجلاس میں وزیراعظم شہباز شریف پارٹی رہنماؤں سے موجودہ سیاسی صورتحال سے متعلق تفصیلی مشاورت کرینگے۔

اس کے علاوہ اس اہم اجلاس میں پنجاب اسمبلی میں تحریک عدم اعتماد پر بھی بات چیت ہوگی اور عمران خان کے اسمبلیوں سے استعفے کے اعلان پر بھی گفتگو کی جائے گی۔

ذرائع کا مزید کہنا ہے کہ وزیراعظم پارٹی رہنماؤں سے آئندہ کی حکمت عملی پر رائے بھی طلب کریں گے۔

ترجمان ن لیگ خیبرپختونخوا

اس حوالے سے رکن اسمبلی پی ایم ایل این اختیار ولی خان نےکہا کہ وزیراعلیٰ محمود خان بادام نہیں توڑ سکتے اسمبلی کیا توڑینگے، خیبرپختونخوا اسمبلی چار کروڑ عوام کی امانت ہے دفاع کرینگے۔

ترجمان ن لیگ خیبرپختونخوا نے مزید کہا کہ وزیراعلیٰ کے خلاف عدم اعتماد جمع کرینگے اور عدالت سے رجوع کر سکتے ہیں، اگر پی ٹی آئی اسمبلی سے مستعفی ہوئی تو نیا قائد ایوان منتخب کر لینگے۔