وفاقی دارالحکومت میں قرآن بورڈ تشکیل دینے کا عمل شروع کر دیا گیا ہے۔

تفصیلات کے مطابق قومی اسمبلی نے گزشتہ روز قرآن بورڈ تشکیل دینے کے بل کی منظوری دی تھی جس کے بعد آج وزارت مذہبی امور نے اس پر کام شروع کر دیا ہے۔

18ویں ترمیم کے بعد اشاعت قرآن اغلاط سے پاک طباعت و ریکارڈنگ کے لیے وفاقی بورڈ تشکیل دیا جائیگا، اسلام آباد میں قرآن بورڈ تشکیل پائے گا۔

بل کے مطابق قرآن پاک کے قدیم نسخوں کو بہتر انداز میں ری سائیکلنگ کے لیے بھی استعمال میں لایا جائے گا، قرآن پاک کے قدیم نسخوں کو متبرک انداز میں تدفین کے علاوہ ری سائیکلنگ کی جا سکے گی۔

قرآن پاک کی ری سائیکلنگ کے لئے پلانٹ بھی اسلام آباد میں نصب کیا جائے گا۔

قران پاک کی طباعت، آڈیو، ویڈیوز ریکارڈنگ اور قرآن بورڈ کے لئے الگ سے ڈائریکٹوریٹ قائم کیا جائے گا۔

وفاقی وزیر مذہبی امور مفتی عبدالشکور کا کہنا ہے کہ وفاقی قرآن بورڈ وزارت مذہبی امور کے زیر انتظام الگ ڈائریکٹوریٹ میں اپنے امور سر انجام دے گا، قرآن بورڈ میں جید علماء کرام کے ساتھ ماہرین کی ایک اعلی سطحی ٹیم تشکیل دیں گے۔

مفتی عبدالشکور نے کہا کہ وفاقی قرآن بورڈ ایک جامع اور مثالی بورڈ ہو گا۔

انہوں نے مزید کہا کہ 18ویں ترمیم کے بعد قرآن کی طباعت، آڈیو ویڈیو ریکارڈنگ سمیت ری سائیکلنگ صوبوں کو ٹرانسفر ہو گئی، اس وقت سے آج تک اسلام آباد میں اس سلسلے میں کوئی اقدام نہیں اٹھایا گیا تھا۔