عدالت نے وزیراعلیٰ پنجاب پرویزالہٰی اور پنجاب کابینہ کو بحال کرنےکا تحریری حکم جاری کردیا، عدالت کا تحریری فیصلہ بول نیوز کو موصول ہوگیا ہے۔

جسٹس عابد عزیز شیخ پرمشتمل 5رکنی لارجر بنچ نے تحریری حکم جاری کیا، عدالت کا تحریری حکم چھ صفحات پرمشتمل ہے۔

تحریری حکم میں عدالت نے گورنر، سپیکر حکومت پنجاب سے جواب طلب کرلیا۔

مزید پڑھیں؛ عدالت نے وزیراعلیٰ پنجاب اور پنجاب کابینہ کو فوری بحال کردیا

تحریری فیصلے کے مطابق عدالت نے گورنر پنجاب اور چیف سیکرٹری کے نوٹیفیکیشنز معطل کردیئے، اٹارنی جنرل اورایڈووکیٹ جنرل عدالت پیش ہوکرآئینی اور قانونی نکات پر عدالتی معاونت کریں۔

تحریری فیصلے میں کہا گیا ہےکہ عدالت نے وزیراعلیٰ پنجاب کی اسمبلی نہ توڑنے کی یقین دہانی پر عبوری حکم سنایا، تحریری فیصلے میں پرویز الہٰی کا بیان حلفی بھی لکھا گیا ہے، پرویز الہٰی نے بیان حلفی دیا کہ حتمی عدالتی فیصلہ آنے تک اسمبلی نہ توڑنے کی یقین دہانی کراتے ہیں۔

تحریری فیصلے میں مزید کہا گیا ہےکہ گورنر کے وکیل خالد اسحاق بغیر وکالت نامہ عدالت کے سامنے پیش ہوئے، گورنر کے وکیل نےکہا کہ وزیراعلیٰ سات دن میں اعتماد کا ووٹ لینے کی یقین دہانی کرائیں تو نوٹیفیکیشن واپس لیا جائے گا۔