آرمی چیف جنرل سید عاصم منیر نے کہا ہے کہ پاک فوج محنت سے حاصل کیے گئے امن کو مزید مستحکم کرنے کیلئے پرعزم ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے شمالی وزیرستان اور تربیلا کا دورہ کیا جس کے دوران انہوں نے شمالی وزیرستان میں یادگار شہدا پر پھولوں کی چادر چڑھائی۔

اس دوران آرمی چیف کو شمالی وزیرستان میں سیکیورٹی صورتحال پر بریفنگ دی گئی۔

جنرل سید عاصم منیر نے مادر وطن کیلئے جانیں دینے والوں کی قربانیوں کا سراہتے ہوئے کہا کہ ہم دہشتگردوں اور سہولت کاروں کا گٹھ جوڑ توڑنے کیلئے پرعزم ہیں، پاک فوج کی توجہ سیکیورٹی صورتحال بہتر بنانے پر مرکوز ہے۔

آرمی چیف کا کہنا تھا کہ پاک فوج جنگ کو دہشتگردوں تک لے جانے، سہولت کاروں کا گٹھ جوڑ توڑنے کے لیے بھی پرعزم ہے، ہم دہشتگردوں کو شکست دے کر بذریعہ سماجی اقتصادی ترقی، دیرپا امن یقینی بنائیں گے۔

ان کا یہ بھی کہنا تھا کہ پاک فوج محنت سے حاصل کیے گئے امن کو مزید مستحکم کرے گی، دہشتگردی کی جنگ میں کامیابیاں پاکستانی قوم اور قانون نافذ کرنے والے اداروں کی عظیم قربانیوں سے ممکن ہوئی ہیں۔