آئی ایس پی آر نے کہا ہے کہ شمالی وزیرستان میں سیکیورٹی فورسز اور دہشتگردوں کے درمیان فائرنگ کا تبادلہ ہوا جس میں 1 دہشتگرد ہلاک ہو گیا ہے۔

پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے شیوا میں سیکیورٹی فورسز اور دہشتگردوں کے درمیان فائرنگ کا تبادلہ ہوا جس میں بدنام زمانہ دہشتگرد کمانڈر محمد نور عرف سراکئی مارا گیا، ہلاک دہشت گرد سے اسلحہ اور گولہ بارود بھی برآمد ہوا ہے۔

آئی ایس پی آر کا کہنا ہے کہ ہلاک دہشتگرد سیکیورٹی فورسز کے خلاف ہائی پروفائل دہشتگردی کی کارروائیوں کے ساتھ ساتھ اغوا برائے تاوان میں بھی سرگرم تھا۔

علاقے کے مقامی لوگوں نے آپریشن کو سراہا اور علاقے سے دہشت گردی کی لعنت کے خاتمے کے لیے بھرپور تعاون کا بھی اظہار کیا ہے۔