اسد عمر نے کہا ہے کہ صوبائی حکومت نے سندھ میں کرپشن کا بازار گرم کیا ہوا ہے۔

تفصیلات کے مطابق پاکستان تحریک انصاف کے مرکزی سیکرٹری جنرل اسد عمر کی زید صدارت سندھ کی اعلٰی قیادت کا اجلاس ہوا جس میں آنے والے انتخابات اور سندھ کی موجودہ سیاسی صورتحال پر تفصیلی بات چیت کی گئی۔

اجلاس کی صدارت کرتے ہوئے اسد عمر نے کہا کہ سندھ حکومت نے کرونا وائرس اور سیلاب متاثرین کے فنڈ بھی نہ چھوڑا، صوبائی حکومت نے سندھ میں کرپشن کا بازار گرم کیا ہوا ہے۔

پی ٹی آئی کے رہنما کا کہنا تھا کہ موٹر وے منصوبے میں میگا کرپشن کی داستانیں سامنے آچکی ہیں، سندھ حکومت سب کو نوچ نوچ کر کھا رہی ہے۔

اسد عمر کا یہ بھی کہنا تھا کہ انشاءاللہ انکی کرپٹ اور جاگیردارنہ حکومت کے دن گنے جا چکے ہیں اور اب ان کی کرپشن زدہ حکومت کا اختتام قریب ہے۔

پاکستان تحریک انصاف کے مرکزی سیکرٹری جنرل اسد عمر کا مزید کہنا تھا کہ سندھ میں آنے والے انتخابات میں تحریک انصاف انکا مکمل طور پر صفایا کردے گی۔

اجلاس میں تحریک انصاف سندھ کے صدر علی زیدی، سابق وزیر اعلیٰ غوث علی شاہ ، لیاقت جتوئی، سابق گورنر سندھ عمران اسماعیل،حلیم عادل شیخ، مبین جتوئی، فردوس شمیم نقوی ، سدرہ عمران، سنجے گنگوانی، آغا ارسلان، اور دیگر بھی موجود تھے