پاکستان تحریک انصاف (پی ٹی آئی) کے چیئرمین عمران خان کی طرف سے دو صوبائی اسمبلیاں توڑنے کے اعلان پر پی ڈی ایم کی پریشانی مزید بڑھ چکی ہے۔

تفصیلات کے مطابق اسمبلیاں ٹوٹنے کی خبر سن کر پی ڈی ایم سربراہ مولانا فضل الرحمن ڈیرہ اسماعیل خان سے اسلام آباد پہنچ گئے۔

پی ڈی ایم کا سربراہی اجلاس اگلے ہفتے بلائے جانے کی تیاریاں کی جا رہی ہیں۔

پی ڈی ایم کی قیادت پنجاب اور کے پی کے میں الیکشن سے متعلق مشاورت کرے گی۔

یہ بھی پڑھیں؛ عمران خان کا 23 دسمبر کو پنجاب اور خیبرپختونخوا اسمبلی تحلیل کرنے کا اعلان

پی ڈی ایم دو صوبوں میں اتحاد بنا کر الیکشن لڑنے یا سیٹ ایڈجسٹمنٹ پر غور کرے گی۔

اجلاس میں قانونی ماہرین سے مشاورت کر کے الیکشن کو موخر کرانے پر مشاورت ہو گی۔

منعقدہ اجلاس میں تیئس دسمبر سے پہلے دونوں صوبوں میں تحریک عدم اعتماد جمع کرانے پر بھی غور ہو گا۔

پیپلز پارٹی نے اہم اجلاس طلب کر لیا

دوسری جانب عمران خان کے اسمبلیاں توڑنے کے اعلان پر پیپلز پارٹی نے بھی اہم اجلاس طلب کر لیا ہے۔

پیپلز پارٹی کے اہم اجلاس میں تحریک انصاف کی جانب سے اسمبلیاں توڑنے کی صورت میں پارٹی لائحہ عمل پر بات ہو گی۔

ذرائع کا کہنا ہے کہ آئندہ 24 گھنٹے میں ارکان کو اجلاس کے وقت سے آگاہ کر دیا جائے گا۔

تمام ارکان کو اجلاس میں شرکت کے لیے اپنی موجودگی یقینی بنانے کے لئے ہدایات جاری کر دی گئی ہیں۔

اجلاس میں ارکان سے آئندہ لائحہ عمل کے بارے میں تجاویز بھی لی جائیں گی۔

یہ پڑھیں؛ عمران خان کا اسمبلیاں توڑنے کا اعلان؛ پیپلز پارٹی نے اہم اجلاس طلب کر لیا

مسلم لیگ (ن) نے بھی کل اہم اجلاس طلب کر لیا

اس کے علاوہ وزیر اعظم شہباز شریف نے بھی (ن) لیگ کا اجلاس کل طلب کر لیا ہے۔

اجلاس میں اسمبلیاں تحلیل ہونے سے بچانے کے لئے معاملات پر غور کیا جائے گا۔

اجلاس میں قانونی، آئینی معاملات کے تحت مختلف پہلوئوں پر غور ہو گا۔

مسلم لیگ (ن) کے اجلاس میں نواز شریف اور مریم نواز ویڈیو لنک کے ذریعے شرکت کریں گے

کل منعقد ہونے والے اجلاس میں مسلم لیگ (ن) کی سینئر قیادت بھی شریک ہو گی۔

ضرور پڑھیں؛ اسمبلیاں ٹوٹنے کا اعلان؛ وزیر اعظم نے کل ن لیگ کا اجلاس طلب کر لیا