اے این ایف کی منشیات کے خلاف کامیاب کارروائیوں کے دوران بھاری مقدار میں منشیات برآمد کرلی گئی ہے۔

تفصیلات کے مطابق اینٹی نارکوٹکس فورس (اے این ایف) نے ملک بھر میں منشیات اسمگلروں کے خلاف کارروائیاں کرتے ہوئے بھاری مقدار میں منشیات برآمد کر لی ہے۔

اے این ایف حکام نے لسبیلہ کے قریب کارروائی کرتے ہوئے دو گاڑیوں میں 360 کلو گرام چرس اور اسلحہ کوئٹہ سے کراچی اسمگل کرنے کی کوشش ناکام بناتے ہوئے دو ملزمان کو گرفتار کر لیا ہے تاہم حراست میں لیے گئے ملزمان کوئٹہ کے رہائشی تھے۔

دوسری کارروائی میں، سنگجانی ٹول پلازہ، اسلام آباد کے قریب ایک ٹرک کو قبضے میں لے کر 25 کلو اور 200 گرام چرس اور 7 کلو اور 200 گرام افیون برآمد کی گئی ہے جبکہ خیبر کے دو رہائشی پکڑے گئے۔

علاوہ ازیں کوہاٹ درہ آدم خیل کے قریب پلاسٹک کے تھیلوں سے 18 کلو گرام چرس برآمد کر لی گئی۔

آخر کار حیدرآباد میں کارروائی کرتے ہوئے ایک ملزم کو گرفتار کر کے اس کے قبضے سے 1 کلو 500 گرام چرس برآمد کر لی گئی۔

ملزمان کے خلاف انسداد منشیات ایکٹ کے تحت الگ الگ مقدمات درج کر لیے گئے۔