وزارت خزانہ نے اقتصادی ایمرجنسی کے بارے میں سوشل میڈٰیا پر زیرگردش افواؤں کی تردید کردی ہے۔

وزارت خزانہ کا کہنا ہے کہ ملک میں معاشی ایمرجنسی کی کوئی منصوبہ بندی نہیں ہورہی ہے جبکہ ایسی افواؤں کا مقصد معاشی صورتحال بارے غیر یقینی صورتحال پیدا کرنا اور قومی مفادات کےخلاف ہے۔

وزارت خزانہ نے کہا کہ ایسی افوائیں وہ عناصر پھیلا رہے ہیں جو پاکستان کو خوشحال نہیں دیکھنا چاہتے ہیں جبکہ پاکستان کی معاشی صورتحال کو سری لنکا کے ساتھ تشبیع دینا غیرمناسب ہے۔

ادارے کا کہنا ہے کہ پاکستان کی معاشی صورتحال کوبہتر بنانے کیلئے حکومت بھرپور کوششیں کررہی ہے جبکہ حکومت آئی ایم ایف کے ساتھ کیے گئے تمام وعدے پورے کرنے کیلئے بھی پرعزم ہے۔

ادارے کا کہنا تھا کہ حکومت کفایت شعاری کے حوالے سے متعدد اقدامات اٹھا رہی ہے جبکہ حکومت درآمدی بل کم کرنے کیلئے توانائی کی بچت کیلئے بھی اقدامات اٹھا رہی ہے۔

 وزارت خزانہ کا کہنا تھا کہ ائی ایم ایف کے ساتھ نواں جائزہ اجلاس اب ایڈوانس سٹیج پر ہے۔

وزارت خزانہ نے مزید کہا کہ مستقبل قریب میں غیرملکی ادائگیوں کے دباؤ میں کمی کا بھی امکان ہے۔