بانی پاکستان قائدِ اعظم محمدعلی جناح کا 147 واں یوم پیدائش آج انتہائی عقیدت، احترام اور ملی جوش و جذبے کے ساتھ منایا جا رہا ہے، اس موقع پر کراچی میں مزارِ قائد پر گارڈز کی تبدیلی کی پروقار تقریب منعقد ہوئی۔

تقریب میں پاک فضائیہ کے کیڈٹس سے گارڈز کے فرائض پاکستان ملٹری اکیڈمی کاکول کے دستے نے سنبھال لیے۔

قائد اعظم محمد علی جناح کا 147 واں یوم پیدائش
مزار قائد پر گارڈز کی تبدیلی کی تقریب
براہ راست دیکھیں :https://www.bolnews.com/urdu/pakistan/2022/12/386896/amp/#QuaideAzamDay pic.twitter.com/H1sTVGopst

— BOL Network (@BOLNETWORK) December 25, 2022

تقریب کے مہمان خصوصی میجر جنرل عمر عزیز تھے جنہوں نے گارڈز کا معائنہ کیا، مزار قائد پر فاتحہ پڑھی اور پھولوں کی چادر بھی چڑھائی۔

اس کے علاوہ اعزازی گارڈز نے مہمان خصوصی میجر جنرل عمر نسیم کو جنرل سلام پیش کیا اور انہوں نے مہمانوں کی کتاب پر تاثرات بھی درج کیے۔

اس موقع پر گورنرسندھ، وزیراعلیٰ، کمشنر کراچی اور دیگر اہم شخصیات مزار قائد پر حاضری دیں گے جبکہ تینوں افواج کے نمائندے، ڈی جی رینجرز بھی مزار قائد پر حاضری دیں گے۔

یاد رہے کہ بابائے قوم قائد اعظم محمد علی جناح کے یوم پیدائش پر ملک بھر میں یوم قائد کی مناسبت سے سیمینارز، کانفرنسز اور تقاریب منعقد ہو رہی ہیں، سرکاری اور نجی سطح پر بھی یوم قائد کی مناسبت سے تقاریب منعقد ہونگی۔

ان تقریبات کا مقصد نوجوانوں کو قائد اعظم کے وژن اور پاکستان کے نظریہ سے آگاہ کرنا ہے۔

اس کے علاوہ بانی پاکستان کو ان کی گراں قدر خدمات اور برصغیر کے مسلمانوں کے لیے آزاد اور خود مختار وطن پاکستان کی جہدوجہد کے لئے شاندار الفاظ میں خراجِ عقیدت پیش کیا جائے گا۔

واضح رہے کہ قائدِ اعظم محمد علی جناحؒ 25 دسمبر 1876ء کو آج ہی کے روز کراچی میں پیدا ہوئے تھے۔ اس دن کی مناسبت سے پاکستان سمیت دنیا بھر میں آباد پاکستانی بابائے قوم کو ان کے 146 ویں یوم پیدائش پر بھر پور انداز سے خراج عقیدت پیش کررہے ہیں۔