اسلام آباد: وزیر اعظم شہباز شریف کے صاحبزادے سلیمان شہباز چار سالہ خود ساختہ جلاوطنی ختم کر کے پاکستان واپس پہنچ گئے۔

تفصیلات کے مطابق سلیمان شہباز سعودی عرب سے سعودی ایئر لائن کے ذریعے رات 1 بج کر 05 منٹ پر اسلام آباد ایئرپورٹ پہنچے۔

وزیراعظم شہباز شریف کے صاحبزادے سلمان شہباز وطن واپس پہنچ گئے pic.twitter.com/YarK6bZvjd

— PML(N) (@pmln_org) December 10, 2022

اسلام آباد ایئرپورٹ پہنچتے ہی سلیمان شہباز ایئرپورٹ پر کھڑے نجی طیارے میں سوار ہو کر لاہور روانہ ہوگئے۔

وزیراعظم ہاؤس پہنچنے پر وزیراعظم شہباز شریف نے اپنے صاحبزادے کو گلے لگایا اور پھولوں کے ہار پہنا کر بیٹے سلمان شہباز کا استقبال کیا۔

خیال رہے کہ سلیمان شہباز کیسز کے باعث لندن منتقل ہوئے تھے، سلیمان شہباز کیسز میں شہباز شریف کے ساتھ شریک ملزم ہیں۔

یاد رہے کہ عدالت نے سلیمان شہباز کو 13 دسمبر کو سرنڈر کرنے کا حکم دے رکھا ہے جبکہ نیب کورٹ نے سلیمان شہباز کو مفرور قرار دے رکھا ہے، سلیمان شہباز منی لانڈرنگ کے کیس میں نیب عدالت کو مطلوب ہیں۔

جینا مرنا پاکستان میں ہے، سلیمان شہباز

دو روز قبل وزیراعظم شہباز شریف کے صاحبزادے سلیمان شہباز نے کہا تھا کہ چار سال بعد واپس جارہا ہوں، جینا مرنا پاکستان میں ہے۔

سلیمان شہباز نے وطن آمد سے قبل ایک ویڈیو بیان جاری کیا تھا جس میں انہوں نے اعتراف کیا کہ ن لیگ دور میں کیسز بنے، پی ٹی آئی حکومت نے ختم کیے۔

شہباز شریف کے صاحبزادے نے سابق چیئرمین نیب جاوید اقبال کو تنقید کا نشانہ بناتے ہوئے کہا تھا کہ ڈیلی میل کے معافی مانگنے پر ثابت ہوا کہ ہمارے نظام کو یرغمال بنایا گیا تھا۔

سلیمان شہباز کا کہنا تھا کہ سابق چیئرمین نیب جاوید اقبال کو بلیک میل کرکے ہماری خلاف مقدمات بنوائے اور مسلسل جھوٹ بلوایا گیا، وہ کیسز نہ بناتے تو برخاست کردیا جاتا، ہم اپنے دشمنوں کے ساتھ بھی ایسا ناروا سلوک کرنا پسند نہ کریں۔

وزیراعظم شہباز شریف کے صاحزادے سلیمان شہباز کا مزید کہنا تھا کہ ہمارے خلاف پاکستان اور برطانیہ میں مقدمات بنوانے کیلئے پاکستانی وسائل کا بے دریغ استعمال ہوا۔