پاکستان تحریک انصاف کے رہنما عمران اسماعیل نے کہا ہے کہ ہمیں ان سے پس پردہ مذاکرات کی کیا ضرورت ہے؟ جب مذاکرات کرنے ہوں گے سرعام کریں گے۔

عمران اسماعیل نے ‘دنیا بول ہے’ میں گفتگو کرتے ہوئے کہا کہ عمران خان نے ان کو مذاکرات کی بار بار پیشکش کی ہے، ہم ون پوائنٹ ایجنڈا عام انتخابات پر بات کرنے کے لیے تیار ہیں، جب بھی انتخابات پر بات کرنی ہوں ہمارے دروازے کھلے ہیں۔

سابق گورنر سندھ نے کہا کہ یہ وہ لوگ ہیں جنہوں نے معیشت کو تباہ حال کردیا ہے، انہوں نے عوام کے لیے کچھ نہیں کرنا۔

انہوں نے کہا کہ شہباز شریف کے لیے مشہور تھا کہ زبردست ایڈمنسٹریٹر ہیں، وزیراعظم شہبازشریف بھی فیل ہو گئے ہیں اور ایٹمی دھماکا کرنے والے نواز شریف بھی فیل ہو گئے ہیں، یہ قابضین ہیں انہوں نے ملک پر قبضہ کیا ہوا ہے۔

‘پرویزالہیٰ کا خیال ہے ابھی اسمبلی کو تحلیل نہیں کرنا چاہیے’

عمران اسماعیل نے کہا کہ پرویز الہیٰ اپنی سیاست اپنے طریقے سے کرتے ہیں، پرویزالہیٰ کا خیال ہے ابھی اسمبلی کو تحلیل نہیں کرنا چاہیے۔

انکا کہنا ہے کہ پرویز الہیٰ نے صاف کہا ہے کہ عمران خان کیساتھ کھڑا ہوں، ملکی معاشی صورتحال میں عمران خان کو حکومت لینے سے انکار کردینا چاہیے۔

‘تباہ حال معیشت کو ٹھیک کرنا آسان نہیں ہے’

پی ٹی آئی رہنما نے کہا کہ اس تباہ حال معیشت کو ٹھیک کرنا آسان نہیں ہے، یہ حکومت کے ساتھ اس لیے چپکے ہوئے ہیں کہ کیسز معاف کرانے ہیں۔

سابق گورنر سندھ نے کہا کہ ایم کیوایم کو اپنا پسند کا گورنر بھی نہیں مل سکا، یہ کچھ بھی کرلیں ان سے کراچی نہیں چل سکتا۔

انہوں نے کہا کہ کراچی کو مضبوط بلدیاتی نظام اور مئیر کی ضرورت ہے، پیپلزپارٹی کو کراچی سے سروکار نہیں، ایم کیو ایم وزارتوں کے مزے لوٹ رہی ہے۔

عمران اسماعیل نے مزید کہا کہ پی ٹی آئی کراچی کی نمائندگی کرتی ہے، طاقتور مئیر ہی بلدیاتی نظام کو بہتر کرنے کا ضامن ہے۔

پی ٹی آئی کا رواں ماہ کے آخر میں اسمبلیاں تحلیل کرنے کا فیصلہ

دوسری جانب پاکستان تحریک انصاف نے رواں ماہ کے آخری ہفتے میں اسمبلیاں تحلیل کرنے کا فیصلہ کرلیا۔

گزشتہ روز پاکستان تحریک انصاف کی سینئر قیادت کا مشاورتی اجلاس عمران خان کی زیر صدارت ہوا تھا جس کی اندرونی کہانی سامنے آگئی۔ اجلاس میں  پی ٹی آئی نے رواں ماہ کے آخری ہفتے میں اسمبلیاں تحلیل کرنے کا فیصلہ کرلیا۔

اجلاس سے خطاب کے دوران سابق وزیراعظم عمران خان کا کہنا تھا لوگ اس غلط فہمی سے باہر نکل آئیں کہ اسمبلیاں تحلیل نہیں ہوں گی کیوں کہ پاکستان مجھے پی ٹی آئی سے زیادہ عزیز ہے۔

خیال کاسترو کے صوبائی وزیر کی حیثیت سے حلف لینے پر سینئر قیادت نے ناراضگی کااظہار کیا اور ق لیگ کی سیاسی حکمت عملی پر سینیر رہنماوں کی جانب سے تحفظات کا اظہار بھی کیا گیا۔