وفاقی وزیر توانائی خرم دستگیر نے کہا ہے کہ آئندہ تین چار ماہ میں مہنگائی میں کمی واضح ہوگی۔

تفصیلات کے مطابق وفاقی وزیر توانائی خرم دستگیر نے میڈیا سے گفتگو کرتے ہوئے کہا کہ بجلی کے بل میں اضافے کے حوالے سے کوئی تجویز زیر غور نہیں ہے۔

انہوں نے کہا کہ سرکلر ڈیٹ میں اضافے کی وجہ سیلاب ہے جس سے ادائیگی کا توازن خراب ہوا ہے۔

ان کا کہنا تھا کہ گرڈ سٹیشن کی تعمیر سے سرگودھا میں بجلی کی ترسیل بہتر ہوگی، گرڈ سٹیشن تین جگہ سے لنک کیا جائے گا جبکہ گرڈ سٹیشن کینو پراسیسنگ فیکٹریوں کو بھی سہولت ملے گی۔

یہ بھی پڑھیں؛ موجودہ حکومت ماحول دوست اور سستی بجلی کی پیداوار پر توجہ دے رہی ہے، خرم دستگیر

خرم دستگیر نے کہا کہ تھرکول منصوبے کی ابتدا نواز شریف نے کی جبکہ گوادر سے خنجراب تک جہاں بھی ترقی نظر آئے گی وہاں شیر کا نشان ہوگا۔

انہوں نے کہا کہ اب دیا جلانے والوں کی حکومت ہے جبکہ آئندہ تین چار ماہ میں مہنگائی میں واضح کمی ہوگی اور جنہوں نے پہلے بھی کر کے دکھایا ہے وہی کریں گے۔

یہ بھی پڑھیں؛ اگلے تین سالوں میں ہم بجلی سولر سے فراہم کرینگے، خرم دستگیر

ان کا کہنا تھا کہ ایک جھوٹا اور بدکردار شخص پاکستان کی ترقی نہیں کر سکتا جبکہ یہ ملک بد کرداری اور جھوٹ کی نحوست کی وجہ سے ہی تباہ ہوا ہے۔

وفاقی وزیر توانائی خرم دستگیر نے مزید کہا کہ بہت جلد نواز شریف پاکستان میں ہونگے اور وہ ہی ایک بار پھر ملک کو ترقی کی موٹروے پر ڈالیں گے۔

یہ بھی پڑھیں: بجلی کے شعبے میں مسائل بہت زیادہ ہیں، خرم دستگیر