حافظ نعیم الرحمان نے کہا ہے کہ کراچی ترقی کرتا ہے تو ملک ترقی کرتا ہے لیکن کراچی کو مسلسل نظر انداز کیا جارہا ہے۔

تفصیلات کے مطابق حافظ نعیم الرحمان نے کراچی کے تباہ حال انفرااسٹرکچر اور متعلقہ اداروں کی غفلت پر ادارہ نورالحق میں پریس کانفرنس کرتے ہوئے کہا کہکراچی میں ہر جگہ لوٹ مار مچی ہوئی ہے، شہر میں اب نوجوان مایوس ہورہے ہیں۔

انہوں نے کہا کہ آج 60 لاکھ سے زائد نوجوان اس ملک کو چھوڑ کر چلے گئے ہیں ان نوجوانوں میں ڈاکٹرز انجینئرز شامل ہیں لیکن غریب لوگوں پر اسکول کے بھی دروازے بند ہوگئے ہیں ۔

انہوں نے مزید کہا کہ ماضی میں سرکاری اسکول و کالج سے نکلنے والے ملک کی باگ ڈور سنبھالتے تھے  اور آج سرکاری ادارے تباہی کے دہانے پر ہیں، کراچی اس وقت تباہی کے دہانے پر ہے اور شہر کے حکمران سیٹ کے چکر میں لگے ہیں ، کسی کو کوئی غرض نہیں کہ شہر کی سڑکیں کس حالت میں ہیں ۔

حافظ نعیم الرحمان نے کہا کہ ایڈمنسٹریٹر نے آتے ہی نوازنا شروع کردیا ہے، تعیناتی کے بعد شیڈول بھی جاری کردئے گئے اور اس وقت شہری چاہتے ہے کہ الیکشن ہوجائے لیکن پارٹی کی بندر بانٹ میں ایڈمنسٹریٹر کی تبدیلی کی گئی۔

ان کا کہنا تھا کہ اس بار بلدیاتی انتخابات میں دونوں پارٹیاں جان جائیں گی کہ اب انکی کراچی میں کوئی حیثیت نہیں ہے کیونکہ کراچی کے عوام سے کسی کو ہمدردی نہیں ہے۔

انہوں نے کہا کہ الیکشن کے بعد جو میئر ہوگا وہ ذمہ داریاں سنبھالے گا، ایم کیوایم والے لوٹ مار کےلیے اپنا ایڈمنسٹریٹر چاہتے ہیں، ان کو ناجائزکاموں پرپردہ ڈالنا مقصود ہے۔