کوئٹہ: بلوچستان ہائیکورٹ نے پاکستان تحریک انصاف (پی ٹی آئی) کے رہنما شہباز گل پر قلعہ عبداللہ میں درج مقدمہ ختم کرنے کا حکم دے دیا۔

بلوچستان ہائیکورٹ کے جج جسٹس عبدالحمید بلوچ نے مسلح افواج اور اداروں کے خلاف بیان پر شہباز گل کے خلاف درج مقدمے کے خاتمے کے لیےدرخواست پر سماعت کی۔

پی ٹی آئی رہنما شہباز گل کیس کی پیروی انصاف لائر فورم کے سید اقبال شاہ ایڈووکیٹ، شمس رند ایڈووکیٹ اور دیگر نے کی۔

شہباز گل کے وکیل اقبال شاہ ایڈووکیٹ نے عدالت کو بتایا کہ سینیٹر اعظم سواتی کی طرح شہباز گل کے خلاف کے بھی بلوچستان میں ایف آئی آر درج کی گئی تھی، جس کو ختم کرنے کے لیے آج بلوچستان ہائی کورٹ میں درخواست جمع کرادی گئی ہے۔

عدالت نے ریمارکس دیے کہ ایک ہی کیس میں کیسے قلعہ عبداللہ میں مقدمہ درجہ کیا گیا، سپریم کورٹ کے ججمنٹ ہے کہ ایک ہی واقعے کے دو مقدمات نہیں ہوسکتے، اس طرح مقدمات عدالت اور قانون کے ساتھ مذاق ہے۔

عدالت نے فیصلہ سناتے ہوئے پی ٹی آئی رہنما شہباز گل کے خلاف بلوچستان کے ضلع قلعہ عبداللہ میں درج مقدمے کو ختم کرنے کا حکم دے دیا۔

واضح رہے کہ بلوچستان پولیس نے پاکستان تحریک انصاف (پی ٹی آئی) کے رہنما شہباز گل کو قلعہ عبداللہ میں درج بغاوت کے مقدمے کے سلسلے میں طلب کر رکھا تھا۔

پولیس کے مطابق پی ٹی آئی رہنما شہباز گل کے خلاف درج کی گئی فرسٹ انفارمیشن رپورٹ (ایف آئی آر) میں پیکا ایکٹ کی سات دفعات شامل تھے۔

شہباز گل کے وکیل کی بول سے گفتگو

دوسری جانب پی ٹی آئی رہنما شہباز گل کے وکیل سید اقبال شاہ نے بول نیوز سے گفتگو کرتے ہوئے کہا کہ بلوچستان نے ہائی کورٹ نے سب سے پہلے بے بیناد مقدمات کو ختم کرکے انصاف کے تقاضوں کو پورا کیا ہے۔

انہوں نے کہا کہ پاکستان میں سب سے پہلے اعظم سواتی اور شہباز گل کے خلاف مقدمات کو بلوچستان ہائیکورٹ نے ختم کیا ہے، عدالت نے شہباز گل پر قلعہ عبداللہ میں درج مقدمہ ختم کرنے کا حکم دیا اور مقدمات پر براہمی کا بھی اظہار کیا۔

اقبال شاہ ایڈوکیٹ نے مزید کہا کہ ہم نے کہا کہ اور بھی مقدمات ہیں تو سامنے لائیں جس پر پولیس حکام نے کہا کہ ایک ہی مقدمہ ہے، اعظم سواتی اور شہباز گل پر مقدمات غیر قانونی تھے، انصاف کے حصول پر عدالت کے شکر گزار ہیں۔