آرمی چیف جنرل سید عاصم منیر نے کہا ہے کہ بلوچستان کے عوام کی سلامتی اور تحفظ کیلیے ہرممکن کوشش کی جائے گی۔

پاک فوج کے شعبہ تعلقات عامہ (آئی ایس پی آر) کے جاری کردہ اعلامیہ کے مطابق آرمی چیف جنرل سید عاصم منیر کا دو روزہ دورہ بلوچستان کا دورہ کیا ہے۔

قبل ازیں آرمی چیف کی کوئٹہ آمد پر کور کمانڈر کوئٹہ لیفٹیننٹ جنرل آصف غفور نے استقبال کیا۔

اس موقع پر آرمی چیف کو آپریشنل، تربیتی اور فارمیشن کے دیگر امور پر تفصیلی بریفنگ دی گئی۔

آئی ایس پی آر کا کہنا ہے کہ آرمی چیف نے کور ہیڈ کوارٹرز میں یادگار شہداء پر حاضری دی، پھولوں کی چادر چڑھائی اور فاتحہ خوانی کی۔

آرمی چیف نے کمانڈ اینڈ اسٹاف کالج کوئٹہ اور اسکول آف انفنٹری اینڈ ٹیکٹکس کا بھی دورہ کیا۔

آئی ایس پی آر کا کہنا ہے کہ آرمی چیف جنرل سید عاصم منیر نے نوجوان افسران اور انسٹرکٹرز سے بات چیت کی، مستقبل کے میدان جنگ کے چیلنجز سے نمٹنے کے لیے پیشہ ورانہ مہارت پر توجہ مرکوز رکھنے کا مشورہ دیا جبکہ جنوبی بلوچستان میں سلامتی امور اور محفوظ ماحول یقینی بنانے کے لیے اقدامات سے آگاہ بھی کیا۔

آرمی چیف جنرل سید عاصم منیر کا کہنا تھا کہ بلوچستان کے عوام کی سلامتی اور تحفظ کے لیے ہر ممکن کوشش کی جائے گی جبکہ صوبے میں پائیدار امن سے سماجی و اقتصادی ترقی کے لیے سازگار ماحول یقینی بنایا جا سکتا ہے۔