وزیراعظم شہباز شریف کے بیٹے سلیمان شہباز نے کہا ہے کہ  پچھلے چند سال میں جو کھیل تماشا عمران خان نے کیا وہ ساری دنیا نے دیکھا  کہ کس طرح شریف فیملی کو انتقامی کارروائی کا نشانہ بنایا گیا۔

اسلام آباد ہائی کورٹ کے باہر میڈیا سے گفتگو کرتے ہوئے سلیمان شہباز نے کہا ہے کہ الحمد اللہ میں آج چار سال دو ماہ بعد واپس آیا ہوں اور ہم نے اپنے آپ کو لیگل سسٹم کے سامنے پیش کرتے ہوئے کورٹ میں سرینڈر کردیا ہے۔

 انہوں نے جسٹس ریٹائرڈ جاوید اقبال کو احتساب کے نظام پر کالا دھبہ قرار دیتے ہوئے کہا کہ اسے ڈرا دھمکا کر شریف فیملی کے خلاف جعلی مقدمات بنوائے گئے اور شریف فیملی کے لوگوں کو گرفتار کرنے کے لیے دباؤ ڈالا جاتا تھا، اسی دوران رانا ثنا ء اللہ پر ہیروئن کا جھوٹا مقدمہ بنایا گیا جس میں بریت سے تھپڑ پڑا ہے۔

انہوں نے مزید کہا کہ شہزاد اکبر پاکستان سے بھاگے ہوئے ہیں اور انہوں نے جو کچھ پاکستان کے ساتھ کیا وہ بھی سب کے سامنے ہیں لیکن ہم واپس آئے ہیں اور سمجھتے ہیں کہ اب یہاں فیئر انوائرمنٹ ہے اور ہم اپنے کیسز کا مکمل دفاع بھی کریں گے ۔

خیال رہے کہ اس سے قبل اسلام آباد ہائی کورٹ میں منی لانڈرنگ کیس میں وزیراعظم کے صاحبزادے سلیمان شہباز سے متعلق کیس کی سماعت ہوئی۔

اسلام آباد ہائی کورٹ  نے سلیمان شہبازکی حفاظتی ضمانت منظور کرتے ہوئے انھیں چودہ روز میں ٹرائل کورٹ میں پیش ہونے کا حکم دے دیا۔

چیف جسٹس اسلام آباد ہائی کورٹ جسٹس عامرفاروق نے منی لانڈرنگ کیس کی سماعت کی جس میں وزیراعظم کے صاحبزادے سلیمان شہبازاپنے وکیل کے ہمراہ پیش ہوئے۔

سلیمان شہباز کے وکیل ایڈووکیٹ امجد پرویز نے عدالت کو بتایا کہ عدالت نے سلیمان شہباز کو پیش ہونے کا حکم دیا تھا۔ سلیمان شہباز عدالت میں پیش ہوگئے ہیں۔

ایف آئی اے اور نیب مقدمات میں سلیمان شہباز نے حفاظتی ضمانت کے لیے اسلام آباد ہائی کورٹ سے رجوع کیا۔

حفاظتی ضمانت کے لئے اسلام آباد ہائی کورٹ نے سلیمان شہباز کو ذاتی حیثیت میں پیش ہونے کا حکم دے رکھا ہے۔