لاہور: پاکستان تحریک انصاف (پی ٹی آئی) کے رہنما فواد چوہدری نے کہا ہے کہ جب بھی اسپیکر کے پاس جانا چاہتے ہیں وہ بھاگ جاتے ہیں۔

سابق وفاقی وزیر فواد چوہدری نے زمان پارک کے باہر گفتگو کرتے ہوئے کہا کہ اسپیکر قومی اسمبلی کے ساتھ بات کر رہے ہیں، جب بھی اسپیکر کے پاس جانا چاہتے ہیں وہ بھاگ جاتے ہیں۔

انہوں نے کہا کہ اگر استعفیٰ قبول نہیں کرنا چاہتے تو ہم اسلام آباد کیسے جائیں گے، استعفیٰ قبول کریں اور ملک میں الیکشن کروائیں۔

فواد چوہدری نے مزید کہا کہ جو حکومت اسلام آباد میں بلدیاتی الیکشن کروانے کو تیار نہیں وہ قومی الیکشن کیسے کروائے گی

پی ٹی آئی ارکان کا کل قومی اسمبلی جانے کا پلان ملتوی

اس سے قبل تحریک انصاف کے ارکان قومی اسمبلی کے استعفوں کی تصدیق کے معاملے پر پی ٹی آئی ارکان نے کل قومی اسمبلی جانے کا پلان ملتوی کردیا ہے۔

تحریک انصاف کے ارکان کی جانب سے کل قومی اسمبلی جانے کا پلان ملتوی کردیا گیا ہے اور خیبرپختونخوا ہاؤس میں بھی جمع نہ ہونے کا فیصلہ کیا گیا ہے۔

پی ٹی آئی ارکان کی جانب سے کل قومی اسمبلی نہ جانے کا فیصلہ اسپیکر قومی اسمبلی راجہ پرویز اشرف کی عدم دستیابی کے باعث کیا گیا ہے۔

خیال رہے کہ چیئرمین پی ٹی آئی عمران خان کو کل خیبرپختونخوا ہاؤس اسلام آباد میں ارکان سے خطاب کرنا تھا۔

پی ٹی آئی ارکان کا استعفوں کی تصدیق کیلئے پیش ہونے کا فیصلہ

دو روز قبل پاکستان تحریک انصاف (پی ٹی آئی) کے ارکان نے 28 دسمبر کو اسپیکر چیمبر میں استعفوں کی تصدیق کیلئے پیش ہونے کا فیصلہ کیا تھا۔

ذرائع قومی اسمبلی کے مطابق اسپیکر قومی اسمبلی راجہ پرویزاشرف کی طرف سے استعفوں قبول کرنے سے گریز کی پالیسی اپنا لی گئی ہے۔

ذرائع نے بتایا کہ اسپیکر شہید محترمہ بے نظیر بھٹو کی برسی کے لئے گڑھی خدابخش روانہ ہوجائیں گے اور 27 دسمبر کو اسپیکر قومی اسمبلی راجہ پرویزاشرف بے نظیر بھٹو شہید کی برسی کے جلسے میں شرکت کریں گے۔

اس کے علاوہ 28 دسمبر کو اسپیکر قومی اسمبلی  پارٹی کے خدابخش میں اجلاس میں شریک ہوں گے جبکہ 28 دسمبر کی رات یا 29 دسمبر کو اسپیکر آپس اسلام آباد آئیں گے اور ایک ہفتے کے لئے آسٹریلیا انٹرنیشنل سسپیکرز یونین کانفرنس میں چلے جائیں گے۔

یہ بھی پڑھیں: پی ٹی آئی کے 123 ارکان اسمبلی کا جمعرات کو اسپیکر کے سامنے پیش ہونے کا فیصلہ

ذرائع قومی اسمبلی کے مطابق  پی ٹی آئی  ارکان کو اسپیکر نے الگ الگ استعفوں کی تصدیق کے لئے بلانے کا کہہ دیا ہے، پی ٹی آئی کے پارلیمانی لیڈر شاہ محمود قریشی کو پیغام دے دیا گیا ہے کہ ان کے ارکان الگ الگ آئیں۔

ذرائع کا کہنا تھا کہ اگر 28 دسمبر کو پی ٹی آئی ارکان آئے تو استعفوں کی تصدیق کا عمل نہیں ہوسکے گا، ایک تو اسپیکر 28 دسمبر کو شہر سے باہر ہوں گے اور دوسرا ارکان کو الگ الگ آنے کا ابھی وقت نہیں دیا گیا۔

قومی اسمبلی کے ذرائع کے مطابق ارکان کے استعفوں کی تصدیق تب ہی ہوگی جب انہیں مقررہ تاریخ پر اسپیکر الگ الگ بلائیں گے۔