نگران وزیر اعلیٰ خیبر پختونخوا محمد اعظم خان نے کہا ہے کہ صوبائی حکومت موجودہ مالی صورتحال میں غیر ضروری اخراجات کی متحمل نہیں ہو سکتی ہے۔

تفصیلات کے مطابق نگران وزیر اعلیٰ خیبر پختونخوا محمد اعظم خان کی زیر صدارت اجلاس ہوا جس میں صوبے کی موجودہ معاشی صورتحال اور مالیاتی امور کا جائزہ لیا گیا۔

محمد اعظم خان کو بریفنگ دیتے ہوئے بتایا گیا کہ فیڈرل ٹرانسفرز کے تحت صوبے کو فنڈز کی متقلی میں تاخیر اور وفاق کے ذمے بقایا جات کی عدم ادائیگی کے باعث صوبائی حکومت کو مالی مشکلات کا سامنا ہے۔

نگران وزیر اعلیٰ خیبر پختونخوا کو بریفنگ دیتے ہوئے مزید بتایا گیا کہ 61.89 پن بجلی کے خالص منافع کی مد میں وفاق کے ذمے ارب روپے بقایا ہیں۔

اس موقع پر نگران وزیر اعلیٰ خیبر پختونخوا نے این ایف سی، این ایچ پی اور ضم اضلاع کے فنڈز کی مد میں ادائیگیوں کی بندش کا معاملہ وفاقی حکومت کے ساتھ اٹھانے کا فیصلہ کیا۔

محمد اعظم خان نے کہا کہ صوبے خصوصاً ضم اضلاع کے ترقیاتی فنڈز کی بندش سمیت وفاق سے جڑے دیگر مالی معاملات وزیر اعظم کے ساتھ اٹھائے جائیں گے۔

وزیر اعلیٰ خیبر پختونخوا نے متعلقہ حکام کو صوبائی حکومت کی بچت مہم پر صحیح معنوں میں عملدرآمد یقینی بنانے کی ہدایت دی۔

محمد اعظم خان نے مزید ہدایت دی کہ دستیاب مالی وسائل کے دانشمندانہ استعمال اور بہتر طرز حکمرانی کے لئے ٹھوس اقدامات اٹھائے جائیں۔

وزیر اعلیٰ خیبر پختونخوا محمد اعظم خان نے مزید کہا کہ صوبائی حکومت موجودہ مالی صورتحال میں غیر ضروری اخراجات کی متحمل نہیں ہو سکتی ہے۔