پاکستان تحریک انصاف کے سینئر رہنما فواد چوہدری کی اہلیہ حبا چوہدری  نے وزیراعظم شہباز شریف سے سوال کیا ہے کہ فواد چوہدری کہاں ہیں؟

حبا چوہدری نے اسلام آباد میں میڈیا سے گفتگو کرتے ہوئے کہا کہ وزیراعظم جواب دیں فواد چوہدری کہاں ہیں؟ چیف جسٹس سے ہاتھ جوڑ کر کہتی ہوں از خود نوٹس لیں۔

انہوں نے کہا کہ فواد چوہدری سے کوئی رابطہ نہیں ہوا، کسی کو معلوم نہیں فواد کہاں ہیں، چیف جسٹس اور وزیراعظم سے گزارش ہے نوٹس لیں، اسلام آباد پولیس سے درخواست ہے تعاون کریں۔

اہلیہ فواد چوہدری نے کہا کہ ہم کھڑے ہیں، میں اکیلی ہی ان کیلئے کافی ہوں، ہم نے کرپشن کر کے ایون فیلڈ اپارٹمنٹس نہیں لئے، عمران خان پر حملہ ہوا اور اب سیکیورٹی بھی ہٹادی گئی۔

یہ بھی پڑھیں: ڈی ایس پی لیگل کو فواد چوہدری کو عدالت میں پیش کرنے کا وقت بتانے کی ہدایت

انکا کہنا ہے کہ فواد چوہدری مخصوص نشست پر نہیں منتخب ہوکر آئے، ان کے منہ پر کپڑا ڈال کر پیش نہیں کرنے دیں گے۔

حبا چوہدری نے مزید کہا کہ فواد چوہدری کو دہشتگردوں کی طرح پیش کیا گیا، عدالتی حکم کے باوجود فواد کو اہلخانہ سے نہیں ملوایا گیا، ہمارے جذبات کم نہیں ہوں گے۔

وکیل فواد چوہدری کی گفتگو

اس سے قبل ڈسٹرکٹ اینڈ سیشن کورٹس اسلام آباد میں الیکشن کمیشن کے خلاف فواد چوہدری سے متعلق کیس میں سماعت میں وقفے کے بعد میڈیا سے گفتگو کرتے ہوئے  وکیل فواد چوہدری ڈاکٹر بابر اعوان نے کہا کہ فواد چوہدری کیس میں انسانی حقوق کی دھجیاں اڑائی گئیں، فواد چوہدری کے منہ پر کپڑا ڈال کر انھیں عدالت میں پیش کیا گیا۔

وکیل بابراعوان نے کہا کہ شہنشاہ سائفر نے حکم دیا آج اسلام آباد بند ہوگا، نہ عدالت کو اورنہ ہی وکیل کومعلوم ہے کہ فواد چوہدری کہاں ہیں۔ فواد چوہدری کو کچھ ہوا تو ذمہ دار شوبازاوران کی ٹیم ہوگی۔

انہوں نے کہا کہ فواد چوہدری نے ویڈیو بیان تسلیم کیا۔ ملزم کومرضی کاوکیل کرنےکاحق ہوتاہے، ہمیں فواد چوہدری سے مشاورت نہیں کرنے دی گئی۔

انکا کہنا تھا کہ کسی نوٹس کے بغیر فواد چوہدری کیخلاف پٹیشن دائرہوگئی۔ فواد چوہدری کو پہلے لاہور اور پھر جیل سے اغوا کیا گیا، جلد بازی میں انصاف کچلا جاتا ہے۔

بابراعوان نے مزید کہا کہ الزام جوبھی ہوملزم کو فیئرٹرائل کا حق ہوتا ہے۔ جسمانی ریمانڈ کے خاتمے کے بعد جوڈیشل ریمانڈ دیا جاتا ہے۔ جوڈیشل ریمانڈ کے بعد ضمانت ملزم کا حق ہوتا ہے۔