ایم کیو ایم پاکستان کے جنرل ورکرز اجلاس کے بعد ایم کیو ایم پاکستان کے وفد کی آج پاکستان ہاؤس آمد متوقع ہے۔

تفصیلات کے مطابق متحدہ قومی موومنٹ (ایم کیو ایم) پاکستان کے وفد کی آج پاک سر زمین پارٹی (پی ایس پی) کے آفس آمد اور دونوں پارٹیوں کی قیادت کی ملاقات متوقع ہے جس کی سربراہی ڈاکٹر خالد مقبول صدیقی کریں گے۔

ایم کیو ایم پاکستان کے وفد کی آج پی ایس پی آفس آمد متوقع
وفد کی سربراہی خالد مقبول صدیقی کریں گے #BOLNews #BreakingNews #MQMPakistan pic.twitter.com/elFDDTVwVZ

— BOL Network (@BOLNETWORK) January 3, 2023

ذرائع نے بتایا کہ ایم کیو ایم کی جانب سے پی ایس پی کو بلدیاتی حلقہ بندیوں پر احتجاج اور اے پی سی میں شرکت کی دعوت دیے
جانے کا امکان ہے۔

ذرائع کا کہنا تھا کہ ایم کیو ایم پاکستان کچھ دنوں میں حلقہ بندیوں کے خلاف احتجاجی ریلی کا انعقاد کرے گی اور ریلی میں شرکت کیلئے کراچی کے حقوق کیلئے آواز اُٹھانے والی مختلف سیاسی جماعتوں کو بھی مدعو کیا جائے گا۔

اس کے علاوہ ایم کیو ایم پاکستان کی جانب سے آج جنرل ورکرز اجلاس میں حلقہ بندیوں پر احتجاجی ریلی کا اعلان متوقع ہے۔

ذرائع نے مزید بتایا کہ اعلان کے بعد  ایم کیو ایم کا وفد پی ایس پی سمیت کراچی کی دیگر سیاسی جماعتوں کے دفتر جاکر احتجاج میں شرکت کی دعوت دے گا۔

اب حلقہ بندیوں میں تبدیلی کی قانون اجازت نہیں دیتا، پی پی کا دوٹوک مؤقف

اس سے قبل پاکستان پیپلزپارٹی کی جانب سے دوبارہ حلقہ بندیوں پر مؤقف پیش کیا گیا کہ اب حلقہ بندیوں میں تبدیلی کی قانون اجازت نہیں دیتا ہے۔

 گزشتہ روز پیپلزپارٹی اور متحدہ قومی موومنٹ (پاکستان) کا کراچی میں ہونے والے اجلاس کے متعلق اہم اور واضح مؤقف سامنے آیا ہے۔

اس اجلاس میں شریک اہم ذرائع نے بول نیوز سے خصوصی گفتگو کرتے ہوئے کہا کہ پی پی نے اجلاس میں دو ٹوک مؤقف رکھتے ہوئے بتایا کہ پی پی نے ایم کیو ایم کی پہلے ہی ہر فرمائش پوری کی ہے ۔

انہوں نے بتایا کہ الیکشن کمیشن اور ضابطہ اخلاق کے باوجود ایڈمنسٹریٹر کے تعیناتی کی فرمائش بھی ایم کیو ایم کی پوری کی لیکن اب حلقہ بندیاں تبدیل نہیں کرسکتے۔

انہوں نے مزید کہا کہ پی پی نے اجلاس میں دو ٹوک موقف رکھا اور کہا کہ حلقہ بندیوں میں اب تبدیلی کی قانون اجازت نہیں دیتا جبکہ آصف زرداری نے بھی وزیراعلیٰ اور سندھ حکومت کے وزراء کی اس قانونی بات کو تسلیم کیا ہے۔

یہ بھی پڑھیں؛ ایم کیو ایم نے حکومت سے علیحدہ ہونے دھمکی دے دی

خیال رہے کہ ایم کیو ایم پاکستان اور پیپلز پارٹی میں اختلافات کو ختم کرنے کے حوالے سے بلاول ہاؤس میں اہم بیٹھک ہوئی۔ جس میں مسلم لیگ (ن) کے وفاقی وزراء اور گورنر سندھ کامران ٹیسوری نے بھی شرکت کی۔

ذرائع کے مطابق اجلاس ختم ہونے کے بعد گورنر سندھ ،ن لیگی اور ایم کیو ایم رہنما میڈیا سے بات کیے بغیر بلاول ہاؤس کراچی سے روانہ ہوگئے۔

ذرائع نے بتایا کہ اجلاس بے نتیجہ ختم ہوگیا جبکہ پی پی اور ایم کیو ایم کے مابین حلقہ بندیوں پر ڈیڈ لاک برقرار ہے۔