اسلام آباد: وزیر اعظم شہباز شریف کی جانب سے مشکل وقت میں پاکستان کا ساتھ دینے پر سعودی وزیر اعظم اور ولی عہد شہزادہ محمد بن سلمان کا شکریہ ادا کیا گیا ہے۔

تفصیلات کے مطابق وزیراعظم شہباز شریف سے سعودی فنڈ کے وفد کی ملاقات ہوئی جس میں پاکستان میں سعودی عرب کے مختلف ترقیاتی منصوبوں کا جائزہ لیا گیا۔

ملاقات کے دوران وزیر اعظم نے اپنے خیالات کا اظہار کرتے ہوئے کہا کہ پاکستان شہزادہ محمد بن سلمان کی جانب سے سیلاب متاثرین کی بحالی کے لیے ایک ارب ڈالر کی امداد کے اعلان کا شکریہ ادا کرتا ہے۔

شہباز شریف نے مزید کہا کہ سعودی عرب نے ہمیشہ مشکل وقت میں پاکستان کا بھرپور ساتھ دیا ہے، پاکستان سیلاب زدگان کی بحالی کے لیے سعودی عرب کی امداد کو انتہائی قدر کی نگاہ سے دیکھتا ہے۔

ملاقات میں وزیر اعظم نے مشکل کی اس گھڑی میں پاکستان کا ساتھ دینے پرسعودی وزیر اعظم اور ولی عہد شہزادہ محمد بن سلمان کا خصوصی شکریہ ادا کیا۔

خیال رہے کہ ملاقات میں وزیر خزانہ اسحاق ڈار، وزیر قانون اعظم نزیر تارڑ، وزیراعظم کے مشیر احد چیمہ اور متعلقہ اعلیٰ حکام نے شرکت کی۔

سعودی ولی عہد کی پاکستان میں سرمایہ کاری دس ارب ڈالر تک بڑھانے کی ہدایت

دوسری جانب سعودی عرب کے ولی عہد شہزادہ محمد بن سلمان نے پاکستان میں سرمایہ کاری دس ارب ڈالر تک بڑھانے کی ہدایت کردی۔

سعودی میڈیا کی رپورٹ کے مطابق سعودی عرب کے ولی عہد شہزادہ محمد بن سلمان نے پاکستان کی معیشت کی بحالی اور زرمبادلہ کے ذخائر کو مستحکم بنانے کے لیے دس ارب ڈالرز کی خطیر رقم بڑھانے کے لیے لائحہ عمل تیار کرنے کی ہدایت کی ہے۔

مزید  پڑھیں: سعودی عرب نے پاکستان کا پرانا حج کوٹہ بحال کردیا

سعودی ولی عہد شہزادہ محمد بن سلمان نے کہا ہے کہ پاکستان ہمارا برادر اسلامی ملک ہے جس کے معاشی بحران کے خاتمے کے لیے سرمایہ کاری اور زر مبادلہ کے ذخائر میں استحکام لانے کے لیے دس ارب ڈالرز مہیا کیے جائیں گے ۔

اس سے قبل بھی 2 دسمبر 2022 کو اسٹیٹ بینک آف پاکستان کو بطور ڈپازٹ پانچ ملین ڈالر مہیا کرنے کا اعلان کیا گیا تھا۔

سعودی ولی عہد شہزادہ محمد بن سلمان کا کہنا ہے کہ یہ فیصلہ وزیر اعظم شہباز شریف سے رابطوں کے بعد کیا جا رہا ہے تاکہ پاکستان کو معاشی بحران سے نکالا جاسکے اور پاکستانی عوام بہتری کی جانب بڑھیں۔