پنجاب اسمبلی کے بعد اب خیبر پختونخوا اسمبلی بھی تحلیل کردی گئی ہے۔

تفصیلات کے مطابق گورنر خیبرپختونخوا حاجی غلام علی نے خیبرپختونخوا اسمبلی تحلیل کرنیکی سمری پر دستخط کر دیئے ہیں جس کے بعد خیبر پختونخوا کی کابینہ بھی تحلیل ہوگئی ہے۔

اسمبلی کی تحلیل کے بعد گورنر کی محمود خان کو نئے وزیراعلیٰ کی تقرری تک کام کرنیکی ہدایت کی گئی ہے جس کے لئے اپوزیشن لیڈر سے مشاورت کی جائیگی۔

یہ بھی پڑھیں: پنجاب اسمبلی تحلیل کا گزٹ نوٹیفکیشن جاری

اس حوالے سے گورنر کے پی کا کہنا ہے کہ 1973 کے آئین کے آرٹیکل 112 کی شق (1) کے تحت، خیبر پختونخوا کی صوبائی اسمبلی کو فوری طور پر تحلیل کرتا ہوں جس کے ساتھصوبائی کابینہ بھی تحلیل ہو گئی ہے۔

خیال رہے کہ گزشتہ روز وزیراعلیٰ خیبرپختونخوا محمود خان نے اپنا ایک ویڈیو پیغام جاری کیا جس میں ان کا کہنا تھا کہ خان صاحب سے جو وعدہ کیا تھا وہ پورا کردیا ہے اور اسمبلی تحلیل کی سمری پر دستخط کردیے ہیں۔

انہوں نے کہا تھا کہ اسمبلی تحلیل کرنے کی ایڈوائس گورنر ہاؤس ارسال ارسال کردی۔

ان کا کہنا تھا کہ انہوں نے سواچار سال خیبرپختونخوا میں حکومت کی اور جو ہوسکا وہ عوام کے لیے کیا۔

خیبرپختونخوا اسمبلی تحلیل ہونے کا اعلامیہ جاری

وزیراعلیٰ خیبرپختونخوا نے گذشتہ روز ایڈوائس میں صوبائی اسمبلی کو تحلیل کرنے کا مشورہ دیا جس کے بعد گورنر خیبرپختونخوا نے وزیراعلیٰ کی جانب سے بھیجے گئے ایڈوائس پر دستخط کردیئے ہیں۔

آئین کے آرٹیکل 224-A کی شق (4) کے مطابق، موجودہ وزیر اعلیٰ، محمود خان نگران وزیر اعلیٰ کی تقرری تک صوبے کے روزمرہ کے امور انجام دینے کے لیے اپنے عہدے پر فائز رہیں گے۔

نگران وزیر اعلیٰ کا تقرر گورنر کی طرف سے وزیر اعلیٰ اور سبکدوش ہونے والی صوبائی اسمبلی میں قائد حزب اختلاف کی مشاورت سے تین دن کی مقررہ مدت کے اندر کرنا ہے۔

گورنر کا دفتر مذکورہ مدت کے ختم ہونے تک بغیر کسی رسمی تقرری کے مشاورت کے لیے دستیاب ہوگا۔

گورنر خیبرپختونخوا کا چیف سیکرٹری کو خط

گورنر خیبرپختونخوا غلام علی کی جانب سے چیف سیکرٹری شہزاد بنگش کو خط لکھا گیا ہے جس میں بتایا گیا ہے کہ وزیراعلیٰ کی ایڈوائس پر خیبرپختونخوا اسمبلی تحلیل کردی ہے اور صوبائی کابینہ بھی تحلیل کردی گئی ہے۔

خط میں بتایا گیا ہے کہ نگراں حکومت کے قیام تک وزیراعلی کام جاری رکھیں گے اور نگراں وزیراعلی کے تقرر تک روزمرہ کے امور موجودہ وزیراعلیٰ دیکھیں گے ۔

گررنر کے پی نے واضح کیا ہے کہ وزیراعلیٰ کے نگراں حکومت کے قیام تک قانون کے مطابق کام کرنے کو یقینی بنایا جائے۔