وفاقی وزیر احسن اقبال نے کہا ہے کہ معاشی استحکام کیلئے سیاسی استحکام لانا ضروری ہے۔

تفصیلات کے مطابق وفاقی وزیر احسن اقبال نے پاکستان انسٹیٹیوٹ آف ڈویلپمنٹ اکنامکس کا دورہ کیا اور مستقبل میں معاشی بہتری کیلئے 5 نکاتی پالیسی کے حوالے سے گفتگو بھی کی۔

 احسن اقبال نے کہا کہ پاکستان کو ماحولیاتی تبدیلی جیسے بڑے چیلنج کا سامنا ہے۔

انہوں نے کہا کہ حکومت سنبھالی تو بتایا گیا کہ ترقیاتی بجٹ کیلئے فنڈز نہیں ہیں جبکہ ہمیں ملک کی معیشت کو ہر صورت بچانا ہے۔

یہ بھی پڑھیں؛ چار سال بعد ہمیں بحران کا شکار معیشت ورثے میں ملی، احسن اقبال

ان کا کہنا تھا کہ دوست ملکوں کی امداد اور قرضوں پر زیادہ دیر نہیں چل سکتے جبکہ ہمیں آئی ایم ایف اور دیگر ملکوں پر انحصار کم کرنے کیلئے اقدامات بھی کرنا ہونگے۔

ان کا یہ بھی کہنا تھا کہ ہمیں ہر صورت ملک کی پیداواری صلاحیت کو بہتر بنانا ہوگا اور زرعی نظام میں جدید ٹیکنالوجی کے استعمال سے ہی پیداواری صلاحیت بڑھا سکتے ہیں۔

یہ بھی پڑھیں؛ ملک کو بحران سے نکالنے اور معیشت کی بہتری کیلئے سب کو ملکر کام کرنا ہوگا، احسن اقبال

احسن اقبال نے کہا کہ زرعی پیداوار کو بڑھا کر اربوں ڈالرز کا زرمبادلہ کمایا جاسکتا ہے۔

انہوں نے کہا کہ زرمبادلہ کے ذخائر بڑھانے کیلئے ترسیلات زر اور برآمدات  بڑھانا ہونگی۔

ان کا کہنا تھا کہ کوشش ہے کہ پسماندہ طبقے پر مہنگائی کا کم سے کم بوجھ پڑے جبکہ گزشتہ حکومت کے معاہدوں کے باعث ہمیں مشکلات کا سامنا بھی کرنا پڑ رہا ہے۔

یہ بھی پڑھیں؛ پاکستان کے مستقبل کا انحصار نوجوانوں پر ہے، احسن اقبال

ان کا یہ بھی کہنا تھا کہ تیز تر ترقی کیلئے 25 سے 30 ارب ڈالر کی سالانہ بیرونی سرمایہ کاری بہت ضروری ہے۔

 وفاقی وزیر احسن اقبال نے مزید کہا کہ ہمیں ملک میں معاشی اور سیاسی استحکام لانا ہوگا اور معاشی استحکام کیلئے سیاسی استحکام لانا ضروری ہے۔