نگراں خیبرپختونخوا کابینہ کی تشکیل کیلئے ناموں کی فہرست تیار کرلی گئی ہے۔

ذرائع نے بتایا کہ نگراں کابینہ سے متعلق وزیر اعلیٰ محمد اعظم خان نے گورنر اور دیگر شخصیات سے مشاورت کی۔

ذرائع کے مطابق نگراں خیبر پختونخوا کابینہ میں وزراء کی تعداد 10 سے کم ہوگی جبکہ ایک خاتون کو بھی نگراں صوبائی کابینہ کا حصہ بنائے جانے کا امکان ہے۔

ذرائع کا کہنا ہے کہ مختلف شعبوں میں ماہر افراد کو نگراں کابینہ میں شامل کیا جائے گا جبکہ خزانہ، صحت، تعلیم کے نگراں وزراء اپنے شعبوں کے ماہر ہوں گے۔

اس حوالے سے نگراں وزیر اعلیٰ خیبر پختونخوا محمد اعظم خان نے کہا ہے کہ نگراں کابینہ کے حوالے سے مشاورت کر رہا ہوں، نگراں کابینہ میں وزراء کی تعداد کم رکھی جائے گی۔

محمد اعظم خان نے مزید کہا کہ صوبہ مالی مشکلات کا شکار ہے، نہیں چاہتا کہ خزانے پر زیادہ بوجھ پڑے۔

واضح رہے کہ چند روز قبل سابق سول سرونٹ اور خیبر پختونخوا کے وزیر برائے خزانہ منصوبہ بندی و ترقی محمد اعظم خان نگراں وزیر اعلیٰ منتخب ہوئے تھے۔

گورنر خیبر پختونخوا حاجی غلام علی کی جانب سے محمد اعظم خان کی بطور نگراں وزیر اعلیٰ خیبر پختونخوا تعیناتی کا اعلامیہ جاری کردیا گیا تھا۔

اس کے علاوہ نگراں وزیر اعلیٰ خیبرپ ختونخوا محمد اعظم خان نے اپنے عہدے کا حلف اٹھا لیا تھا اور گورنر خیبر پختونخوا حاجی غلام علی نے اُن سے نگراں وزیر اعلیٰ کے عہدے کا حلف لیا۔

اس موقع پر بول نیوز سے خصوصی گفتگو کرتے ہوئے نگراں وزیر اعلیٰ خیبر پختونخوا محمد اعظم خان نے کہا تھا کہ شفاف الیکشن کا انعقاد اولین ترجیح ہے۔ امن و امان کی صورت حال پر توجہ رہے گی۔