بلوچستان کے ضلع لسبیلہ کے علاقے بیلہ میں چینکی اسٹاپ کے قریب مسافر کوچ کھائی میں گرنے کے واقعے کے خلاف ایف آئی آر درج کرلی گئی ہے۔

تفصیلات کے مطابق گزشتہ روز بلوچستان کے ضلع لسبیلہ کے علاقے بیلہ میں چینکی اسٹاپ کے قریب مسافر کوچ کھائی میں گرنے سے کم از کم 41 افراد جاں بحق اور متعدد زخمی ہو گئے تھے۔

اس حوالے سے ذرائع کا کہنا ہے کہ بیلہ کوچ حادثے میں کوچ مالکان اور ڈرائیور کے خلاف ایف آئی آر درج کرلی گئی ہے۔

ایف آئی آر ایس ایچ او بیلہ کی مدعیت میں درج کی گئی ہے جس میں  غفلت لاپرواہی کے مقدمات  شامل ہیں۔

ایف آئی آر  میں 337-322 ، 427٫279٫،109 کے دفعات شامل ہیں اور بتایا گیا ہے کہ  کوچ میں تکنیکی خرابی کے باوجود سفر جاری رکھنے پر حادثہ ہوا  ۔

ابتدائی تحقیقات

ابتدائی تحقیقات کے مطابق سیکرٹری پی ٹی اے ظفر کبدانی  نے بتایا ہے کہ حادثہ ڈرائیور کی غفلت کے باعث پیش آیا ہے تاہملسبیلہ انتظامیہ سے مکمل رابطے میں ہیں اور تحقیقات کا سلسلہ جاری ہے ۔

انہوں نے بتایا ہے کہ تحقیقات میں کوچ حادثے کے اصل محرکات کا تعین اور مستقبل میں ایسے حادثات کے تدارک کےلئے اقدامات کئے جائینگے۔

ان کا کہنا تھا کہ زخمی مسافر کے بیانات میں دوران سفر ڈرائیور کی آنکھ لگ جانے کا امکان سامنے آرہا ہے تاہمصوبائی ٹرانسپورٹ اتھارٹی کا عملہ آج جائے وقوعہ کا دورہ کریگی اور ڈرائیور کی جانب سے غفلت کی تصدیق ہونے کہ صورت میں کمپنی مالک پر بھاری جرمانہ عائد کی جائیگا

انہوں نے کہا کہ جرمانے کے ساتھ ساتھ مذکورہ ٹرانسپورٹ کمپنی کے روٹ پرمنٹ بھی کیسنل کئے جائیں گے۔

دوسری جانب پولیس سرجن کا کہنا ہے کہ جناح اسپتال کے مردہ خانے منتقل کی گئی 38 میں 32 لاشوں کا ڈی این اے سیمپل لے لیا ہے جبکہ32 لاشوں ضروری کارروائی مکمل ہونے کے بعد ایدھی سردخانے منتقل کردیا ہے۔

انہوں نے بتایا کہ دیگر چھ لاشوں کو بھی سیمپل حاصل کرنےکے بعد سردخانے منتقل کیا جائے گا۔

وزیر داخلہ بلوچستان کا اظہار افسوس

وزیر داخلہ بلوچستان ضیاء اللہ لانگو نے لسبیلہ میں المناک ٹریفک حادثے پر افسوس کا اظہار کیا ہے۔

وزیر داخلہ نے زخمیوں کو ہر ممکن طبی امداد فراہم کرنے کی ہدایت دیتے ہوئے کہا کہ ایسے حادثات سے بچنے کے لیے مؤثر اقدامات کیے جانے چاہئیں، حفاظتی تدابیر، ٹریفک قوانین کی پاسداری ایسے حادثات سے بچنے کے لیے انتہائی اہم ہے۔

وزیر داخلہ ضیاء اللہ لانگو نے لواحقین سے دلی ہمدردی اور تعزیت کا اظہار کیا اور لواحقین کے لیے صبر جمیل کی دعا بھی کی۔