خیبر پختونخوا کے ضلع لکی مروت میں پولیس چوکی شہباز خیل پر دہشت گردوں نے حملہ کردیا ہے۔

پولیس ذرائع کے مطابق دہشتگردوں نے آدھی رات کو شہباز خیل پولیس چوکی پر حملہ کیا جس کے نتیجے میں ایک پولیس اہلکار شہید ہوگیا۔

دہشتگردوں کا رات گئے پولیس چوکی پر حملہ
1 اہلکار شہید، پولیس کی بھاری نفری طلب
مکمل ویڈیو دیکھیں: https://www.bolnews.com/urdu/pakistan/2023/01/431711/amp/#BREAKINGNEWS #Incident #BOLNews pic.twitter.com/qsWhgs6czX

— BOL Network (@BOLNETWORK) January 1, 2023

ذرائع نے بتایا کہ پولیس اور حملہ آوروں کے درمیان شدید فائرنگ کا تبادلہ ہوا جس کے باعث میں تحسین اللہ نامی پولیس اہلکار شہید اور ایک حملہ آور بھی مارا گیا۔

پولیس ذرائع کا کہنا تھا کہ مارے گئے دہشتگرد کی شناخت اویس کے نام سے ہوئی ہے، لاشوں کو پوسٹ مارٹم کیلئے ڈی ایچ کیو اسپتال منتقل کردیا گیا ہے۔

اس کے علاوہ سرچ آپریشن کے دوران چوکی کے قریب سے مبینہ دہشت گرد کی لاش بھی برآمد ہوئی ہے۔

پولیس ترجمان کا کہنا ہے کہ مبینہ دہشت گرد کو پولیس کی جوابی کارروائی میں مارے جانے کا امکان ہے۔

خیال رہے کہ حملے کے بعد علاقے میں سرچ آپریشن جاری ہے۔

بنوں میں سیکیورٹی فورسز کی کارروائی، 4 دہشتگرد ہلاک، ایک جوان شہید

گزشتہ روز بنوں میں سیکیورٹی فورسز کی کارروائی میں 4 دہشتگرد ہلاک ہوگئے جب کہ فائرنگ کے تبادلے میں ایک فوجی جوان بھی شہید ہوگیا۔

پاک فوج کے شعبہ تعلقات عامہ (آئی اسی پی آر) کے مطابق سیکیورٹی فورسز نے بنوں کے علاقے جانی خیل میں مصدقہ اطلاعات کی بنیاد پر کارروائی کی۔ کارروائی کے دوران فوجیوں اور دہشت گردوں کے درمیان شدید فائرنگ کا تبادلہ ہوا۔

ترجمان پاک فوج نے بتایا تھا کہ فوجی دستوں کی مؤثر کارروائی کے نتیجے میں 4 دہشت گرد مارے گئے، ہلاک دہشت گرد سیکیورٹی فورسز کے خلاف متعدد کارروائیوں اور معصوم شہریوں کے قتل میں ملوث تھے۔

آئی ایس پی آر کا کہنا تھا کہ شدید فائرنگ کے تبادلے میں بہادر سے لڑتے سپاہی محمد وسیم شہید ہوئے۔ سپاہی محمد وسیم کی عمر 25 سال تھی اور ان کا تعلق خیرپور سے تھا۔ علاقے میں موجود کسی بھی دہشتگرد کے مکمل خاتمے کے لیے آپریشن بدستور جاری ہے۔