وزیراعظم کی جانب سے انور ابراہیم کو ملائیشیا کے وزیراعظم منتخب ہونے پر مبارکباد پیش کی گئی ہے۔

تفصیلات کے مطابق وزیراعظم شہباز شریف کا ملائیشین ہم منصب سے ٹیلی فونک رابطہ ہوا ہے جس دوران انور ابراہیم کو وزارت عظمیٰ کا منصب سنبھالنے پر مبارکباد پیش کی گئی ہے۔

اس دوران دونوں رہنماوں کی دوطرفہ دلچسپی کے امور پر گفتگو ہوئی جبکہ  دوطرفہ تعلقات مزید مضبوط بنانے، تجارت و سرمایہ کاری سمیت باہمی دلچسپی کے تمام شعبوں میں تعاون بڑھانے پر اتفاق کیا گیا۔

مزید پڑھیں؛ انور ابراہیم نے ملائیشیا کے وزیر اعظم کا حلف اٹھا لیا

وزیراعظم شہباز شریف نے ملائیشین ہم منصب کو پاکستان کے سیلاب متاثرین کی امداد اور بحالی کے لئے ڈونرز کانفرنس کے انعقاد سے آگاہ کیا اور 9 جنوری کو جینیوا میں ہونے والی ڈونرز کانفرنس میں شرکت کی دعوت بھی دی۔

ملائیشیا کے وزیراعظم نے ڈونرز کانفرنس میں اعلیٰ سطحی وفد بھجوانے کی یقین دہائی کرا دی ہے۔

علاوہ ازیں وزیراعظم شہباز شریف نے ملائیشیا کے وزیراعظم کو دورہ پاکستان کی بھی دعوت دی جسے انہوں نے قبول کر لیا ہے جبکہ ملائیشیا کے وزیراعظم نے پاکستانی ہم منصب کو ملائیشیا کے دورے کی دعوت دی ہے۔

یہ بھی پڑھیں: عمران خان کی انور ابراہیم کو ملائیشیا کا وزیر اعظم بننے پر مبارک باد