وزیراعظم شہبازشریف کی جانب سے پولیس لائنز پشاور کی مسجد میں خود کش دھماکے کی شدید مذمت کی گئی ہے۔

اس حوالے سے وزیراعظم کا کہنا ہے کہ اللہ تعالی کے حضور سربسجود مسلمانوں کا بہیمانہ قتل قرآن کی تعلیمات کے منافی ہے اور اللہ کے گھر کو نشانہ بنانا ثبوت ہے کہ حملہ آوروں کا اسلام سے کوئی تعلق نہیں ہے۔

انہوں نے کہا ہے کہ دہشت گرد پاکستان کے دفاع کا فرض نبھانے والوں کو نشانہ بنا کر خوف پیدا کرنا چاہتے ہیں لیکن دہشت گردی کے خاتمے کے لئے پوری قوم اور ادارے یکسو اور متحد ہیں۔

یہ بھی پڑھیں: پشاور؛ پولیس لائن مسجد میں دھماکا، 17 نمازی شہید، 100سے زائد افراد زخمی

انہوں نے مزید کہا کہ پاکستان کے خلاف جنگ کرنے والوں کو صفحہ ہستی سے مٹا دیں گے اور ناحق شہریوں کا خون بہانے والوں کو عبرت کا نشان بنائیں گے۔

وزیراعظم کا کہنا تھا کہ خیبرپختونخوا میں امن وامان کی بگڑتی صورتحال پر جامع حکمت عملی اپنائی جائیگی اور وفاق کی جانب سے صوبوں کی انسداد دہشت گردی کی صلاحیت بڑھانے میں تعاون بھی کیا جائیگا۔

وزیر داخلہ کی مذمت:

وفاقی وزیر داخلہ رانا ثناءاللہ کی جانب سے پولیس لائنز پشاور کی مسجد میں دھماکے کی شدید مذمت کی گئی ہے۔

اس حوالے سے رانا ثناء اللہ کا کہنا ہے کہ نمازیوں پر دشت گرد حملہ ایک سفاکانہ اور بذدلانہ فعل ہے، ان پر دہشت گرد حملے کی جتنی زیادہ مذمت کی جائے اتنی کم ہے۔

انہوں نے مزید کہا کہ پشاور پولیس لائنز مسجد واقعے کی تمام پہلوؤں سے تحقیقات کی جارہی ہیں، وفاقی ادارے خیبر پختونخواہ حکومت کی مکمل معاونت کررہے ہیں۔

ان کا کہنا تھا کہ دہشتگرد انسانیت اور اسلام کے دشمن ہیں، پوری قوم نے دہشتگردی کے خلاف جنگ میں عظیم قربانیاں دی ہی ، اپنے شہداءکو سلام عقیدت پیش کرتے ہیں۔

وزیر داخلہ کا کہنا تھا کہ دہشتگردی کو شکست فاش دینگے، ملک دشمنوں کی سازشوں کو ناکام بنائیں گے۔

یہ بھی پڑھیں: پشاور دھماکا، اسپتالوں میں ایمرجنسی نافذ، خون کے عطیات کی اپیل

وزیر خارجہ کی مذمت:

چیئرمین پی پی، وزیر خارجہ بلاول بھٹو زرداری کی جانب سے بھی پشاور میں خودکش حملے کی مذمت کی گئی ہے۔

اس حوالے سے بلاول بھٹو کا کہنا تھا کہ ضمنی اور عام انتخابات سے قبل دہشتگردی کے واقعات معنی خیز ہیں، دہشتگردوں ،ان کے سرپرستوں اور سہولت کاروں کے خلاف سخت کارروائی ہوگی۔

انہوں نے کہا کہ نیشنل ایکشن پلان ہی دہشتگردوں کا علاج ہے اس پر سختی سے عمل کیا جائے گا۔

انہوں نے جیالوں کو پیغام دیا ہے کیا کہ پیپلزپارٹی کے کارکن اور عہدے دار خون کے عطیات دیکر زخمیوں کی جان بچائیں۔