لاہور: پنجاب اسمبلی کی تحلیل کے بعد صوبے کے نگراں وزیراعلیٰ پنجاب کے تقرر کے معاملے پر پاکستان مسلم لیگ ن آج نگراں وزیراعلیٰ پنجاب کے لئے مختلف ناموں پر غور کرے گی۔

اس حوالے سے پارٹی ذرائع نے بتایا کہ پارٹی کی جانب سے جسٹس ریٹائرڈ خلیل الرحمان رمدے، سابق بیوروکریٹ طارق مسعود کھوسہ اور جسٹس جواد ایس خواجہ کے ناموں پر بھی غور ہوگا۔

ذرائع کا کہنا ہے کہ پارٹی کی قیادت نے سینئر رہنماؤں سے نگراں وزیراعلیٰ کے لئے مزید نام بھی طلب کر لئے۔

خیال رہے کہ گورنر پنجاب نے قائم مقام وزیراعلیٰ چوہدری پرویز الہیٰ اور پنجاب اسمبلی میں قائد حزب اختلاف حمزہ شہباز کو نگراں وزیراعلیٰ کی تقرری کے لئے خط لکھ رکھا ہے جبکہ حمزہ شہباز اس وقت بیرون ملک میں مقیم ہیں۔

واضح رہے کہ اسمبلی تحلیل کے بعد نگراں وزیراعلیٰ کو 3 دن کے اندر اندر نامزد کرنا ہوگا جبکہ قائد ایوان اور قائد حزب اختلاف باہمی مشاورت سے نگراں وزیراعلیٰ کو نامزد کریں گے، اگر دونوں میں اختلاف ہو جائے تو اسپیکر فوری طور پر ایک کمیٹی تشکیل دے گا۔

مزید پرھیں: اسمبلی کی تحلیل کے بعد پرویزالہیٰ کب تک نگران وزیراعلیٰ کے فرائض سرانجام دینگے؟

کمیٹی 6 رکنی ہوگی جس میں 3 اپوزیشن اور 3 حکومت کے ارکان اسمبلی شامل ہوں گے، کمیٹی 3 روز میں وزیر اعلیٰ اور قائد حزب اختلاف کے بھجے گئے ناموں میں ایک کا چناؤ کریں گے۔

3  روز میں اگر کمیٹی کسی ایک نام پر اتفاق رائے نہ کر سکی تو پھر معاملہ چیف الیکشن کمشنر کے پاس جائے گا، جو نام قائد ایوان اور قائد حزب اختلاف نے دیے ہوں گے وہ چیف الیکشن کمشنر بھیجے جائیں گے، چیف الیکشن کمشنر 2 روز میں ان میں سے کسی ایک کو نگران وزیراعلیٰ نامزد کریں گے۔

ن لیگ کا سینٹرل ایگزیکٹو کمیٹی کا اجلاس

دوسری جانب مسلم لیگ ن کا سینٹرل ایگزیکٹو کمیٹی کا اجلاس آئندہ ہفتے طلب  کرلیا گیا ہے جس کی صدارت وزیراعظم شہباز شریف کریں گے۔

اجلاس میں آئندہ کی سیاسی حکمت عملی مرتب کرنے کے لئے مشاورت ہوگی جبکہ مریم نواز شریف کی پاکستان واپسی کا فیصلہ کیا جائے۔

اس کے علاوہ اجلاس میں انٹرا پارٹی انتخابات سے متعلق امور کو حتمی شکل دی جائے گی اور ملک میں عام انتخابات کے حوالے سے امور کا بھی جائزہ لیا جائے گا۔

خیال رہے کہ اجلاس کی تاریخ اور مقام کا تعین ایک دو دن میں کرلیا جائے گا جس میں میاں نواز شریف اور مریم نواز لندن سے بذریعہ ویڈیولنک اجلاس میں شرکت کریں گے۔