امیر جماعت اسلامی کراچی حافظ نعیم الرحمٰن نے کہا ہے کہ جماعت اسلامی کا میئر آئے گا تو مسائل حل ہوں گے۔

تفصیلات کے مطابق امیر جماعت اسلامی کراچی حافظ نعیم الرحمٰن نے جلسے سے خطاب کرتے ہوئے کہا کہ 15 جنوری کو جنوری کو الیکشن ہونے ہی ہیں ایک بار ہمارا میئر آیا تو مسائل حل ہوںگے۔

انہوں نے کہا کہ کراچی میں اب بہت لسانیت کی سیاست ہوگئی ہے، نوجوان محلہ کمیٹیاں بنائیں اور اب عوام متحد ہوکر حکمرانوں ٹولے کو تقسیم کردے گی۔

ان کا کہنا تھا کہ پولنگ بوتھ پر فوج اور رینجرز کو تعینات کیا جائے۔

یہ بھی پڑھیں؛ آئین کے مطابق ہمیں ہمارا حق نہیں دیا جا رہا، حافظ نعیم الرحمٰن

حافظ نعیم الرحمٰن نے کہا کہ کراچی کو اون کوئی نہیں کرتا، پیپلز پارٹی پندرہ سال سے لوٹ مار کررہی ہے۔

انہوں نے کہا کہ پیپلز پارٹی پندرہ سال بعد تیس بسیں کراچی کو دے گئی ہے جبکہ ریڈ لائن کے نام پر شہر کھود دیا گیا، ایک سڑک بناتے ہیں تو دوسری ٹوٹ جاتی ہے، یہ کسی کے باپ کا نہیں عوام کے ٹیکس کا پیسہ ہے۔

یہ بھی پڑھیں؛ کراچی کے مسائل کا حل صرف جمعت اسلامی ہے، حافظ نعیم الرحمٰن

ان کا کہنا تھا کہ چار ہزار اسکول ہیں مگر معیاری تعلیم نہیں ہے جبکہ تین سو چھبیس ارب تعلیم کا بجٹ ہے مگر تعلیم نہیں دی جاتی ہے۔
ان کا یہ بھی کہنا تھا کہ جماعت اسلامی کا میئر آئے گا تو کے ایم سی کے آٹھ سو اسکول کو ماڈل اسکول بنائیں گے اور ہم تعلیم کو عام کریں گے۔

امیر جماعت اسلامی کراچی حافظ نعیم الرحمٰن نے مزید کہا کہ ہم سا کوئی ہے تو سامنے آئے اور ہم سے اچھا کوئی کام کرکے دکھائے۔