وزیراعلیٰ پنجاب چوہدری پرویز الہیٰ نے کہا ہے کہ تعلیم کے بغیر کوئی ملک ترقی نہیں کرسکتا۔

وزیراعلیٰ چوہدری پرویز الہیٰ نے جامعہ گجرات کانووکیشن سے خطاب کرتے ہوئے کہا کہ گجرات میں مزید کام کرنے جا رہے ہیں، گرلز ہاسٹل کے لیے 42ارب روپے منظور کر رہا ہوں۔

انہوں نے کہا کہ 8 نئی بسیں، 15 آئی ٹی لیب 4 کروڑ روپے سے بنیں گی، 9 ارب میں انجینئرنگ یونیورسٹی بنانے کا فیصلہ کیا ہے۔

گجرات ضلع نہیں ڈویژن بن گیا ہے

چوہدری پرویز الہیٰ نے کہا کہ گجرات اب ضلع نہیں ڈویژن بن گیا ہے، ہم نے اسے ڈویژن بنا دیا ہے، گجرات کو 2 بار تمغہ شجاعت ملا ہے۔

وزیراعلیٰ پنجاب نے کہا کہ آپ نے پریکٹیکل لائف میں جانا ہے، تعلیم کے بغیر کوئی ملک ترقی نہیں کرسکتا۔

پرویز الہیٰ نے مزید کہا کہ اندازہ نہیں تھا کہ اتنے مشکل حالات میں دوبارہ آؤں گا، اللہ نے مجھے وزیراعلیٰ بنا کر دوبارہ موقع دیا ہے

گزشتہ 100 دنوں میں اتنا کام کیا جو 10 سال میں نہیں ہوا

چند روز قبل وزیراعلیٰ پنجاب چوہدری پرویزالٰہی نے تاجر برادری کے کنونشن سے خطاب کرتے ہوئے کہا تھا کہ جتنا بھی وقت ہے، عوام کی خدمت اور مسائل کے حل پر لگائیں گے، تیز رفتاری سے کام کررہے ہیں، انشاء اللہ منصوبے مکمل کریں گے، حکومتی اخراجات کم کرکے عوام کی ترقی پر لگا رہے ہیں۔

وزیراعلیٰ پنجاب نے کہا کہ  ڈویژنل لیول پرکینسر کے علاج،سرجری اور بچوں کے لئے جدید ترین مشینری مہیا کررہے ہیں، محض اعلان کافی نہیں ہوتے، ترقیاتی منصوبوں کو پایہ تکمیل تک پہنچانا اصل بات ہے، 100  دنوں میں اتنا کام کیا جو 10 سال میں نہیں ہوا۔

وزیراعلیٰ پرویز الہیٰ نے تاجر برادری کے مسائل ترجیحی بنیادوں پر حل کرنے کا اعلان کرتے ہوئے کہا کہ شہباز شریف نے 20سال کے دوران گجرات میں  کوئی کام نہیں کیا، شہباز شریف وزیراعظم بن کر بری طرح ایکسپوز ہوگیا ہے، شہباز شریف نے سیرت اکیڈمی کو تالے لگوا کر ظلم کیا۔