وزیراعلیٰ چوہدری پرویز الہٰی کے اعتماد کے ووٹ کے معاملے پر پنجاب اسمبلی کے آزاد امیدوار نے بھی پی ٹی آئی کی حمایت کا اعلان کردیا ہے۔

تفصیلات کے مطابق چیئرمین تحریک انصاف عمران خان سے پنجاب اسمبلی کے آزاد حیثیت میں منتخب ہونے والے ایم پی اے بلال وڑائچ کی ملاقات ہوئی جس میں بلال وڑائچ کی جانب سے تحریک انصاف کے وژن کی تائید اور وزیراعلیٰ چوہدری پرویز الہٰی کو ووٹ دینے کا اعلان کیا۔

ملاقات میں مرکزی سینئر نائب صدر تحریک انصاف فواد چوہدری اور سینئر صوبائی وزیر میاں اسلم اقبال سمیت دیگر رہنماؤں نے شرکت کی۔

ملاقات کے بعد میڈیا سے گفتگو کرتے ہوئے مرکزی سینئر نائب صدر تحریک انصاف فواد چوہدری نے کہا کہ آج زمان پارک میں پنجاب اسمبلی کے آزاد ممبر بلال وڑائچ نے چئیرمین عمران خان سے ملاقات کی، آزاد ایم پی اے بلال وڑائچ اس سے قبل حمزہ شہباز کے کیمپ میں موجود تھے اور انکو ووٹ دیا تھا۔

یہ بھی پڑھیں: وزیر اعلیٰ پنجاب اعتماد کا ووٹ لیں گے، پی ٹی آئی کا اعلان

فواد چوہدری نے کہا کہ بلال وڑائچ نے عمران خان سے ملاقات کے بعد تحریک انصاف کے وژن پر مکمل اعتماد کا اظہار کیا، بلال وڑائچ چوہدری پرویز الہٰی کو اعتماد کا ووٹ بھی دیں گے۔

مرکزی سینئر نائب صدر تحریک انصاف فواد چوہدری نے مزید کہا کہ وڑائچ فیملی بہت جلد تحریک انصاف میں باقاعدہ شمولیت اختیار کر رہی ہے، بلال وڑائچ کے آنے سے پنجاب اسمبلی میں ہمارے مزید 1 ووٹ کا اضافہ ہو گیا ہے۔

اس موقع پر آزاد ممبر صوبائی اسمبلی بلال وڑائچ نے تحریک انصاف کے نظریے پر عمل پیرا ہونے کا عزم بھی کیا۔

بلال وڑائچ نے کہا کہ میرے لئے خوش آئند بات ہے کہ تحریک انصاف میں شامل ہو رہا ہوں، انشاءاللہ عمران خان کے وژن کے مطابق سیاست کریں گے۔

 ایم پی اے بلال وڑائچ نے مزید کہا کہ تحریک انصاف کی تمام قیادت کا خوش آمدید کہنے پر تہہ دل سے شکر گزار ہوں، تحریک انصاف کے نظریے کو اپناتے ہوئے وزیر اعلیٰ پرویز الہٰی کو ہی ووٹ دوں گا۔