وزیراعلیٰ پنجاب چودھری پرویزالٰہی نے کہا ہے کہ اپوزیشن نے نگران وزیراعلیٰ کے نام پر بھی سیاست چمکانے کی کوشش کی ہے۔

تفصیلات کے مطابق وزیراعلیٰ پنجاب چودھری پرویزالٰہی سے راجہ بشارت اور میاں اسلم اقبال کی ملاقات ہوئی جس میں نگران وزیراعلیٰ اور سیاسی صورتحال کے حوالے سے تفصیلی مشاورت ہوئی اور اسپیکر پنجاب اسمبلی کی سربراہی میں کمیٹی کے اجلاس کے حوالے سے بھی تبادلہ خیال کیا گیا۔

ملاقات میں وزیراعلیٰ پنجاب چودھری پرویزالٰہی نے کہا کہ ہم نے غیر جانبدار شخصیات کے نام نگران وزیراعلیٰ کے لئے پیش کئے جبکہ اپوزیشن نے جانبدار شخصیات کے نام دے کر مذاق کیا ہے۔

انہوں نے کہا کہ اپوزیشن نے نگران وزیراعلیٰ کے نام پر بھی سیاست چمکانے کی کوشش کی ہے لیکن اپوزیشن نگران وزیراعلیٰ کے حوالے سے جو چاہتی ہے وہ خواب پورا نہیں ہوگا۔

یہ بھی پڑھیں؛ ہم نے ہمیشہ عوام کے مفاد کو ترجیح دی ہے، چودھری پرویزالٰہی

 ان کا کہنا تھا کہ امید ہے کہ اسپیکر پنجاب اسمبلی کی سربراہی میں کمیٹی نگران وزیراعلیٰ کے حوالے سے کسی نتیجے پر پہنچ جائے گی اور راجہ بشارت، میاں اسلم اقبال اور ہاشم جواں بخت پر مشتمل کمیٹی کھلے دل کے ساتھ مذاکرات بھی کرے گی۔

ان کا یہ بھی کہنا تھا کہ ہماری کوشش ہوگی کہ نگران وزیراعلیٰ کے نام پر اتفاق رائے جلد ہو۔

وزیراعلیٰ پنجاب چودھری پرویزالٰہی نے مزید کہا کہ انشاء اللہ نگران وزیراعلیٰ وہ آئے گا جس پر کوئی انگلی نہ اٹھا سکے۔