پاکستان تحریک انصاف (پی ٹی آئی) کے رہنما فواد چوہدری نے کہا ہے کہ اعظم سواتی کی اتنے دنوں کے بعد ضمانت انصاف میں تاخیر ہے۔

سابق وفاقی وزیر فواد چوہدری نے بول نیوز سے گفتگو کرتے ہوئے کہا کہ اعظم سواتی پر تشدد ملکی تاریخ کا سیاہ باب ہے، تنقید کرنے پر مقدمات درج کیے گئے۔

انہوں نے کہا کہ اعظم سواتی کی اتنے دنوں کے بعد ضمانت انصاف میں تاخیر ہے، اعظم سواتی نے ظلم کے خلاف دلیرانہ مؤقف اختیار کیا۔

پی ٹی آئی رہنما نے کہا کہ اعظم سواتی کا کیس قانونی طور پر بنتا ہی نہیں تھا، اعظم سواتی کی ضمانت تو ہو گئ، لیکن ہمارے نظام انصاف کے چہرے پر جو سیاہ داغ اس مقدمے نے لگایا ہے اس کا دھلنامشکل ہے۔

 فواد چوہدری نے مزید کہا کہ جرم صرف یہ کہ طاقتور لوگوں پر تنقید کی جرآت کیسے ہوئی ہر صوبے کی عدالت کے چکر لگوا کر پچھتر سالہ بوڑھے شیر کی ہمت توڑنے کی کوششیں کی گئیں لیکن وہ ڈٹ کر کھڑا رہا۔

بابر اعوان

اس سے قبل پاکستان تحریک انصاف کے وکیل بابر اعوان نے کہا کہ سینیٹر اعظم سواتی کی درخواستِ ضمانت اسلام آباد ہائیکورٹ نے منظور کرلی۔

 انہوں نے کہا کہ شاباش عثمان سواتی، آپ نے ہمت سے ساری جگہ والد کی کے کیس کی پیروی کی، آئی ایل ایف اسلام آباد اور راولپنڈی کے وکلاء کی معاونت کا شکریہ ادا کرتے ہیں۔

 بابر اعوان نے مزید کہا کہ مجھے تحریکِ انصاف کے سینیٹرز پر فخر ہے جنہوں نے اعظم سواتی کے حقوق کی پامالی اور اُن کا پروڈکشن آرڈر نہ جاری کرنے پر سینیٹ سے عدالتوں تک، ٹیم بن کر اُن کے شانہ بشانہ کھڑے رہے اور ریاستی تشدد پر آواز اٹھائی، حقیقی آزادی کے حصول تک تحریکِ انصاف جدوجہد جاری رکھے گی۔