وزیر خارجہ بلاول بھٹو زرداری کا کہنا ہے کہ وزیراعظم شہباز شریف کی خارجہ پالیسی کامیاب ہوچکی ہے۔

وفاقی وزیر بلاول بھٹو زرداری نے اسلام آباد میں نیوز کانفرنس کرتے ہوئے کہا کہ پاکستانی معیشت کو نقصان پہنچانے والوں کو منہ توڑ جواب دیا، پاکستان کی معیشت کا غلط تاثر کانفرنس میں ختم ہو گیا، پاکستان کی تنہائی کا تاثر ہمیشہ کیلئے دفن ہو گیا۔

وزیر اعظم نے جنیوا کانفرنس میں ایک تیر سے دو شکار کیے

انہوں نے کہا کہ وزیراعظم کی خارجہ پالیسی کامیاب ہوچکی ہے، جنیوا کانفرنس میں وزیر اعظم نے ایک تیر سے دو شکار کیے ہیں۔

بلاول بھٹو زرداری نے کہا کہ جنیوا کانفرنس میں ہم نے اپنا ٹارگٹ حاصل کرلیا ، وزیر اعظم نے دنیا میں پاکستان کے تنہا ہونے کا تاثر غلط ثابت کردیا، دنیا نے مشکل وقت میں پاکستان کا ساتھ دیا ہے ۔

یورپی یونین نے آگے بڑھ کر ہمارا ساتھ دیا

وفاقی وزیر خارجہ کا کہنا ہے کہ جنیوا کانفرنس پر اتحادی حکومت کو مبارکباد یتا ہوں، ہم سب نے 8 ماہ بہت محنت کی جس کا پھل نظر آرہا ہے۔

انہوں نے کہا کہ یورپی یونین نے آگے بڑھ کر ہمارا ساتھ دیا ، رقوم کو گراؤنڈ تک کیسے پہنچانا ہے یہ ہمارے ہاتھ میں ہے۔

دنیا 9 ارب ڈالر سے زائد کی سرمایہ کاری کو تیار ہے

وزیر خارجہ نے کہا کہ دنیا معاشی بحران کا شکار ہے ، دنیا 9 ارب ڈالر سے زائد کی سرمایہ کاری کو تیار ہے۔

بلاول بھٹو زرداری نے مزید کہا کہ سیلاب متاثرین کی امداد اور تعمیر نو کیلئے 16.2بلین ڈالرز درکار تھے، 16بلین ڈالر کوئی مذاق نہیں ہے ۔