گورنر کے پی حاجی غلام علی نے کہا ہے کہ تحریک انصاف کو تین ماہ کا تربیتی کورس کرانا چاہئیے، ان کو سمجھنا چاہئیے کس سے مذاکرات کرنے ہیں اور کس سے نہیں۔

تفصیلات کے مطابق گورنر کے پی حاجی غلام علی نے کی پریس بریفنگ سے خطاب کرتے ہوئے کہا کہ تحریک انصاف کے پاس پچھتاوے کے سوا کچھ نہیں ہے۔

انہوں نے کہا کہ الیکشن کرانا الیکشن کمیشن کی ذمہ داری ہے، یہ میرا اختیار نہیں کہ انتخابات ہوں یا نہ ہوں لیکن میری ذاتی رائے ہے کہ تمام فیصلے آئین و قانون کیمطابق ہو اور میں چاہونگا کہ آزادانہ اور منصفانہ الیکشن ہوجائے۔

یہ بھی پڑھیں: ملک میں مسلسل بحران پیدا کرنے کی کوشش کی جارہی ہے، گورنر خیبر پختونخوا

انہوں نے مزید کہا کہ سابق حکومت کی عدم توجہ کی باعث صوبے میں امن وامان کی صورتحال بد سے بدتر ہوتی جارہی ہے اس لئے یہ بھی چاہتا ہوں کہ انتخابات کیساتھ امن وامان کی صورتحال کی بہتری اور معاشی مشکلات ختم ہو جس کے لئے موجودہ نگران حکومت کو امن وامان کی جانب توجہ دینا ہوگا۔

گورنر کے پی نے کہا کہ ہم کہتے تھے اسمبلیاں ٹوٹنے کے لیے نہیں جوڑنے کے لیے ہوتی ہیں لیکن ایک شخص اپنی انا کیلئے کہتا تھا کہ میں نے اپوزیشن لیڈر سے ہاتھ نہیں ملاتا اور وہی شخص اب سڑکوں پر پیر کر اسی شخص سے مطالبہ کرتا ہے کہ انتخابات کا انعقاد کیا جائے ۔

ان کا کہنا تھا کہ ان لوگوں کو اب ہر فیصلہ نہ ماننے کو چھوڑنا ہوگا کیونکہ الزام تراشی کی سیاست اب اپنی موت آپ مرنے جارہی ہے، 22 کروڑ عوام سب سے پہلے ریاست کیساتھ ہیں۔

انہوں نے کہا کہ نگراں کابینہ میں عدم مشاورت کا گلہ کرنے والی پی ٹی آئی نے کس سے مشاورت کی تھی؟