پنجاب کے نگراں وزیراعلیٰ کے تقرر کا فیصلہ اب الیکشن کمیشن کرے گا۔

تفصیلات کے مطابق نگراں وزیراعلیٰ پنجاب کے تقرر کے حوالے سے اب تک کوئی حتمی فیصلہ نہیں ہوسکا ہے جس کے بعد  آرٹیکل 224 اے کے تحت نگراں وزیراعلیٰ کے تقرر کا فیصلہ اب الیکشن کمیشن کرے گا۔

حکومت اور اپوزیشن کے دو دو نام الیکشن کمیشن کے پاس پہنچ گئے تاہم الیکشن کمیشن پنجاب کے نگراں وزیراعلیٰ کا اعلان کل کریگا۔

ضرور پڑھیں؛ ہماری ٹیم نے امپورٹڈ ٹولے کو تاریخی سرپرائز دیا، سبطین خان

اس حوالے سے ذرائع کا کہنا ہے کہ چیف الیکشن کمشنر نے نگراں وزیراعلیٰ پنجاب کے تقرر کے لیے اہم اجلاس کل طلب کر لیا ہے جس میں نگراں وزیراعلیٰ کے ناموں پر غور کیا جائے گا۔

اجلاس میں کسی ایک نام پر اتفاق کر کے نگراں وزیراعلیٰ کے تقرر کی منظوری دی جائے گی۔

‎خیال رہے کہ حکومتی اتحاد کی جانب سے احمد نواز سکھیرا اور نوید اکرم چیمہ کے نام تجویز کیے گئے ہیں جبکہ اپوزیشن نے محسن رضا نقوی اور احد چیمہ کو نامزد کررکھا ہے۔

دوسری جانب اسپیکر محمد سبطین خان کا خط میں کہنا تھا کہ آئین پاکستان کے آرٹیکل 112 (1) کے تحت وزیر اعلیٰ کی ایڈوائس پر پنجاب اسمبلی تحلیل ہو چکی ہے، اسمبلی کی تحلیل کے بعد آئین کے آرٹیکل 105 (3) اور 224 اور  224 (A) کے تحت آپ نے پنجاب اسمبلی کے جنرل الیکشن کی تاریخ مقرر کرنا تھی۔

گورنر کو خط لکھتے ہوئے ان کا کہنا تھا کہ آئین پاکستان کے مذکورہ بالا آرٹیکل کے تحت آپ 90 دن میں پنجاب اسمبلی کے جنرل الیکشن کی تاریخ مقرر کرنے کے پابند ہیں، اسمبلی کی تحلیل کے سات روز گزرنے کے باوجود آپ نے پنجاب اسمبلی کے جنرل الیکشن کی تاریخ مقرر نہیں کی۔

علاوہ ازیں  نگراں وزیراعلیٰ کے معاملے پر فواد چوہدری  کا کہنا تھا کہ آرٹیکل 224-A کے مطابق الیکشن کمیشن دو دن کے اندر ان چار ناموں میں سے کسی ایک کو وزیر اعلیٰ نامزد کرے گا جو پارلیمانی کمیٹی کی طرف سے کمیشن کو بھیجے جائینگے۔

انہوں نے بتایا کہ کمیشن اپنی طرف سے نام نہیں دے سکتا ہے، امید ہے الیکشن کمیشن شریف اور زرداری کے فرنٹ مین کی بجائے بہتر نام کا انتخاب کرے گا۔