وفاقی وزیر منصوبہ بندی و ترقی پروفیسر احسن اقبال نے کہا ہے کہ محدود وسائل کے باوجود حکومت سینٹرز آف ایکسیلینس کی مدد کررہی ہے۔

تفصیلات کے مطابق وفاقی وزیر منصوبہ بندی و ترقی پروفیسر احسن اقبال کی زیر صدارت ٹیکنالوجی سینٹرز آف ایکسیلینس کی کارکردگی پر جائزہ اجلاس ہوا ہے۔

اجلاس میں وفاقی وزیر منصوبہ بندی و ترقی پروفیسر احسن اقبال نے کہا کہ 18-2017 میں میں چوتھے صنعتی انقلاب کے تقاضوں کا سامنا کرنے کےلئے چار سینٹرز آف ایکسیلینس کی بنیاد رکھی تھی۔

انہوں نے کہا کہ سینٹرد آف ایکسیلینس کا قیام آرٹیفیشل انٹیلیجننس، روبوٹکس، بگ ڈیٹا اور کلاوڈ کمیوٹنگ کا مقصد چوتھے صنعتی انقلاب کی تیاری تھا۔

ان کا کہنا تھا کہ نینو اور سپیس ٹیکنالوجی کے سینٹر آف ایکسیلنس شروع کئے لیکن پچھلی حکومت کی سرد مہری کے نظر ہوگئے۔

ان کا یہ بھی کہنا تھا کہ تحقیقاتی مراکز اور صنعتوں کا مضبوط رشتہ مستقبل کی کنجی ہے۔

یہ بھی پڑھیں؛ احسن اقبال کی زیر صدارت سینٹرل ڈویلپمنٹ ورکنگ پارٹی کا اجلاس، متعدد پروجیکٹس کی منظوری

احسن اقبال نے کہا کہ محدود وسائل کے باوجود حکومت سینٹرز آف ایکسیلینس کی مالی و انتظامی مدد کررہی ہے۔

انہوں نے کہا کہ امید ہے ٹیکنالوجی سینٹرز آف ایکسیلینس گوگل اور فیس بک جیسے پلیٹ فارم تخلیق کر کہ ملک کا نام روشن کریں گے۔

ان کا کہنا تھا کہ سینٹرز آف ایکسیلینس ملک کو ڈیجیٹل انقلاب کے لئے تیار کرنے میں کلیدی کردار ادا کریں گے۔

ان کا یہ بھی کہنا تھا کہ ٹیکنالوجی سینٹرز آف ایکسیلینس وسطی ایشیاء اور خلیجی ممالک کی ریاستوں کے ساتھ ملکر کام کریں۔

وفاقی وزیر منصوبہ بندی و ترقی پروفیسر احسن اقبال نے مزید کہا کہ سینٹرز آف ایکسیلینس کو ترقی پزیر ممالک کے لئے مثال بنائیں گے۔