وزیر دفاع خواجہ محمد آصف کی آج ایئر ہیڈ کوارٹرز اسلام آباد کے دورے کے دوران سربراہ پاک فضائیہ ایئر چیف مارشل ظہیر احمد بابر سدھو سے ملاقات ہوئی ہے۔

ملاقات کے دوران جیو سٹریٹیجک ماحول اور علاقائی سلامتی کی صورت حال سمیت مختلف امور پر تبادلہ خیال ہوا جبکہ وزیر دفاع نے پاک فضائیہ کی جانب سے ٹریننگ میں کی گئی اصلاحات کو سراہا اور پاک فضائیہ کی بے مثال پیشہ ورانہ مہارت کی تعریف بھی کی۔

اس موقع پر وزیر دفاع خواجہ محمد آصف نے کہا کہ حکومت پاکستان، ملک کے ناقابل تسخیر دفاع کو یقینی بنانے کے لیے پاک فضائیہ کو جدید خطوط پر استوار کرے گی اور اس مقصد کے لیے تمام تر وسائل کو بروئے کار لایا جائے گا جبکہ ان اصلاحات کی بدولت ایسی ہنر مند افرادی قوت تیار کی جاسکے گی جو فضائی دفاع اور قومی سلامتی کے بدلتے چیلنجوں سے نمٹنے کی بھرپور صلاحیت سے لیس ہوگی۔

وزیر دفاع نے ملک میں حالیہ سیلاب کے دوران سیلاب متاثرین کی بحالی کے عمل میں پاک فضائیہ کے غیر معمولی کردار کی تعریف کی جبکہ ایئر چیف نے معزز مہمان کو پاک فضائیہ کی جانب سے جدت طرازی کے عمل کے لیے جاری کوششوں اور مقامی صلاحیتوں کی ترقی کے لیے جاری مختلف منصوبوں کے بارے میں آگاہ کیا۔

یہ بھی پڑھیں؛ نیشنل ایرو اسپیس سائنس اینڈ ٹیکنالوجی پارک پراجیکٹ ایک بہترین ماحول فراہم کرے گا، ترجمان پاک فضائیہ

ترجمان پاک فضائیہ کا کہنا ہے کہ سربراہ پاک فضائیہ نے وزیر دفاع کو پاک فضائیہ کے نیشنل ایرو اسپیس سائنس اینڈ ٹیکنالوجی پارک پراجیکٹ سے بھی آگاہ کیا جبکہ

ظہیر احمد بابر سدھو نے کہا کہ نیشنل ایرو اسپیس سائنس اینڈ ٹیکنالوجی پارک پراجیکٹ کا مقصد ایوی ایشن، اسپیس، آئی ٹی، سائبر اور کمپیوٹنگ کے شعبوں میں مشترکہ تحقیق، ترقی اور اختراع کو فروغ دینا ہے۔

یہ بھی پڑھیں؛ چینی سفیر کی سربراہ پاک فضائیہ سے ملاقات، علاقائی پیش رفت پر تبادلہ خیال

سربراہ پاک فضائیہ ایئر چیف مارشل ظہیر احمد بابر سدھو نے مزید کہا کہ اس پروجیکٹ کے زریعے پاکستان کے لیے سماجی، اقتصادی، تکنیکی اور سائنسی فوائد کو یقینی بنایا جاسکے گا۔