پنجاب اور خیبرپختونخوا اسمبلیوں کے انتخاب کے معاملے پر وفاقی حکومت کی جانب سے نئی مردم شماری کے نتائج تک صوبائی اسمبلیوں کے انتخابات نہ کرانے پر غور کیا جارہا ہے۔

اس حوالے سے ذرائع نے بتایا کہ نئی مردم شماری یکم فروری سے 31 مارچ تک جاری رہے گی اور مردم شماری کے نتائج اپریل میں جاری ہوں گے۔

حکومتی ذرائع کا کہنا ہے کہ مردم شماری تک پنجاب اور خیبر پختونخوا اسمبلی کے انتخابات کے التوا کے لئے عدلیہ سے رجوع کیا جائے گا۔

ذرائع نے بتایا کہ حکومت کا مردم شماری اور بعد ازاں حلقہ بندیوں کو بنیاد بنا کر نگران حکومت کی طوالت پر بھی غور جاری ہے۔

حکومتی ذرائع کا مزید کہنا ہے کہ مشترکہ مفادات کونسل گزشتہ دور حکومت میں انتخابات نئی مردم شماری کی بنیاد پر کروانے کا فیصلہ کرچکی ہے۔

پنجاب اور خیبرپختونخوا اسمبلی کے انتخابات کب ہونگے؟

الیکشن کمیشن پنجاب اور خیبرپختونخوا اسمبلی کے انتخابات اپریل میں کرائے گا جبکہ پنجاب اور کے پی اسمبلی کے انتخابات پر 15 ارب روپے سے زائد کے اخراجات آئیں گے۔

ذرائع کا کہنا تھا کہ خیبرپختونخوا اور پنجاب کے انتخابات عام انتخابات سے قبل کرانے پر اخراجات میں 20 ارب روپے کا اضافہ ہوگا۔

دوسری جانب الیکشن کمیشن آف پاکستان (ای سی پی) کی جانب سے دونوں صوبائی اسمبلیوں اور قومی اسمبلی کی خالی نشستوں پر انتخابات کی تیاری شروع کردی گئیں۔

ذرائع الیکشن کمیشن کے مطابق قومی اسمبلی کی 64 جنرل نشستوں پر ضمنی انتخابات کرائے جائیں گے جبکہ پنجاب اسمبلی کی 297، خیبر پختونخوا کی 115 جنرل نشستوں پر انتخابات کرائے جائیں گے۔

ذرائع کا کہنا تھا کہ الیکشن کمیشن نے قومی اسمبلی کی 64 نشستوں پر ضمنی انتخابات مارچ میں کرانے کی تیاری شروع کردی۔

الیکشن کمیشن کے ذرائع نے بتایا کہ قومی اسمبلی کی 64 نشستوں میں ضمنی انتخابات پر 5 ارب روپے سے زائد کے اخراجات آئیں گے جبکہ وفاقی حکومت کی جانب سے عام انتخابات کیلئے الیکشن کمیشن کو 18 ارب روپے فراہم کردیے گئے ہیں۔