آرمی چیف جنرل سید عاصم منیر سعودی عرب اور متحدہ عرب امارات کا سرکاری دورہ پر ہیں۔

پاک فوج کے شعبہ تعلقات عامہ (آئی ایس پی آر) کا کہنا ہے کہ آرمی چیف 4 سے 10 جنوری تک سعودی عرب اور متحدہ عرب امارات کے دورے پر ہیں۔

آئی ایس پی آر نے بتایا کہ آرمی چیف جنرل سید عاصم منیر دونوں ممالک کی سینئر قیادت سے ملاقات کریں گے۔

آئی ایس پی آر کا کہنا تھا کہ ملاقات میں دوطرفہ برادرانہ تعلقات اور باہمی دلچسپی کے امور سمیت فوجی اور سیکیورٹی سے متعلق دوطرفہ تعلقات پر بھی تبادلہ خیال کیاجائے گا۔

یہ بھی پڑھیں: آرمی چیف کی سعودی وزیر دفاع سے ملاقات، فوجی اور دفاعی تعاون بڑھانے پر اتفاق

دوسری جانب آئی ایس پی آر نے بتایا کہ دورہ سعودی عرب کے دوران آرمی چیف جنرل سید عاصم منیر نے سعودی وزیر دفاع شہزادہ خالد بن سلمان سے ملاقات کی۔

آئی ایس پی آر کا کہنا تھا کہ سعودی وزیر دفاع نے سید عاصم منیر کو آرمی چیف بننے پر مبارکباد بھی پیش کی اور پاک سعودی دو طرفہ تعلقات کو مضبوط بنانے پر زور دیا۔

 اس حوالے سے سعودی عرب کے وزیر دفاع شہزادہ خالد بن سلمان نے سماجی رابطے کی ویب سائٹ پر بیان میں کہا ہے کہ پاکستان کے سپہ سالار جنرل عاصم منیر سے ملاقات کرکے اچھا لگا۔

انہوں نے کہا کہ دونوں برادر ممالک کے مابین تذویراتی شراکت داری پر توجہ مرکوز کی گئی، دوطرفہ فوجی اور دفاعی تعلقات کا تفصیلی جائزہ لیا گیا۔

اس موقع پر دونوں جانب سے باہمی تعاون کو مزید مضبوط بنانے پر تبادلہ خیال بھی کیا گیا۔

یہ بھی پڑھیں: معیشت اور دہشتگردی جیسے چیلنجز سے نمٹنے کیلیے اتفاق رائے ضروری ہے، آرمی چیف