سابق اسپیکر قومی اسمبلی اسد قیصر نے کہا ہے کہ حکومت کا رویہ غیر آئینی ہے، ایسے ماحول میں یکجہتی کا سوال ہی پیدا نہیں ہوتا۔

تفصیلات کے مطابق حکومت کی جانب سے پی ٹی آئی کو کل جماعتی کانفرنس میں زبانی کلامی دعوت نامہ بھجوانے کے معاملے پر پاکستان تحریک انصاف کے سینئر رہنما و سابق اسپیکر قومی اسمبلی اسد قیصر نے ردِعمل دیتے ہوئے کہا کہ مجھے کل حکومتی نمائندوں نے فون پر زبانی اے پی سی میں شرکت کی دعوت دی، کانفرنس کی دعوت دینے کا یہ بالکل بھی مناسب طریقہ نہیں ہے۔

اسد قیصر نے کہا کہ ہم سمجھتے ہیں کہ ملک سنگین بحرانوں کا شکار ہے، اس وقت یکجہتی کی اشد ضرورت ہے، حکومت کا رویہ غیر آئینی ہے، ایسے ماحول میں یکجہتی کا سوال ہی پیدا نہیں ہوتا، حکومت کو سب سے پہلے اپنے رویوں میں سدھار لانا ہو گا۔

ان کا کہنا تھا کہ ہم نے اپنے دورِ حکومت میں دہشتگردی پر بہتر حکمت عملی اپنائی، امن قائم کیا، ہماری ہر پالیسی پاکستان کے مفاد کی پالیسی تھی، ہم امن کے لئے اپنے تمام اختلافات بھلانے کے لئے تیار ہیں، ضرورت اس امر کی ہے کہ حکومت اپنے طرزعمل کو بہتر بنائے۔