خیبر پختونخوا کے ضلع بنوں میں پولیس چوکی دڑے پل پر دہشت گردوں نے حملہ کیا تاہم پولیس اہلکاروں نے بروقت کارروائی کرتے ہوئے حملہ پسپا کردیا۔

تفصیلات کے مطابق دہشت گرد حملہ آوروں نے پولیس چوکی دڑے پل پر چھوٹے اور بڑے ہتھیاروں سے حملہ کیا تاہم پولیس اہلکاروں کی بروقت کارروائی نے یہ حملہ پسپا کردیا۔

بنوں پولیس چوکی پر نامعلوم حملہ آوروں کی فائرنگ سے پولیس اہلکار محفوظ رہے تاہم پولیس اہلکاروں کی بروقت جوابی کارروائی سے دہشت گرد فرار ہونے میں کامیاب ہوگئے۔

چند ہفتے قبل بھی بنوں میں بم دھماکہ ہونے کے باعث 1 سپاہی شہید ہو گیا تھا۔

پاک فوج کے شعبہ تعلقات عامہ (آئی ایس پی آر) کے مطابق بنوں کے علاقے جانی خیل میں بم دھماکہ ہوا جس میں ضلع خیبر سے تعلق رکھنے والے سپاہی گل شیر شہید ہو گئے۔

آئی ایس پی آر کا کہنا تھا کہ جانی خیل کے علاقے میں دہشت گردوں کے خلاف آپریشن جاری ہے، آپریشن آخری دہشت گرد کے خاتمے تک جاری رہے گا۔

دہشت گردی کے بڑھتے واقعات

واضح رہے کہ پاکستان گزشتہ کئی سالوں سے دہشت گردی کی لپٹ میں ہے اور دہشت گردی کے ان سیکڑوں واقعات میں اب تک ہزاروں پاکستانی شہری اپنی جانیں دے چکے ہیں۔

پاکستان کے صوبہ خیبر پختونخوا میں دہشت گردی کے واقعات میں تیزی سے اضافہ ہو رہا ہے۔ صوبائی انسداد دہشت گردی فورس کے حراستی مرکز میں زیر حراست عسکریت پسندوں کی جانب سے اہلکاران اور افسران کو یرغمال بنائے جانے کے واقعہ کی وجہ سے خوف و ہراس میں مزید اضافہ ہو گیا ہے۔

یہ بھی پڑھیں: بنوں میں سیکیورٹی فورسز کی کارروائی، 4 دہشتگرد ہلاک، ایک جوان شہید

گزشتہ چند ماہ کے دوران دہشت گردی کے درجنوں واقعات پیش آئے جن میں سیکیورٹی فورسز اور پولیس سمیت کئی شہری ہلاک ہوئے۔

یاد رہے کہ پاکستان کی قومی سلامتی کمیٹی (این ایس سی) نے 27 دسمبر کو ملک میں موجود دہشت گردی کے خطرات کو بےاثر کرنے کے لیے انتھک اور بروقت جوابی اقدامات پر زور دیا۔