گورنر سندھ کامران خان ٹیسوری نے کہا ہے کہ شہر قائد کو روشنیوں کا شہر بنانے کے لئے مل کر کام کرنا ہوگا۔

تفصیلات کے مطابق گورنر سندھ کامران خان ٹیسوری سے متحدہ قومی موومنٹ کے رہنما سید مصطفیٰ کمال اور انیس قائم خانی کی گورنر ہاﺅس میں ملاقات ہوئی جس میں صوبہ کی مجموعی سیاسی صورتحال، معاشی مسائل، شہر قائد کے انفرا اسٹرکچر کے ترقیاتی منصوبوں، اس ضمن میں وفاق کے تعاون اور باہمی دلچسپی کے دیگر امور پر تبادلہ خیال کیا گیا۔

ملاقات میں گورنر سندھ کامران خان ٹیسوری نے کہا کہ شہر قائد کو روشنیوں کا شہر بنانے کے لئے مل کر کام کرنا ہوگا، ملک کے معاشی حب کراچی کی تعمیر و ترقی ہم سب کی مشترکہ ذمہ داری ہے۔

یہ بھی پڑھیں؛ کراچی کی ترقی دراصل پورے ملک کی ترقی ہے، کامران خان ٹیسوری

گورنر سندھ کامران خان ٹیسوری نے مزید کہا کہ شہر قائد کے باسیوں کو بہتر بنیادی سہولیات کی فراہمی کے لئے تمام اسٹیک ہولڈرز سے مل رہا ہوں، تنقید کی پرواہ نہیں لوگوں کو جوڑنے کا کام جاری رکھوں گا اور اس مقصد کے لئے کسی کے پاس بھی جانے کے لئے تیار ہوں۔

اس موقع مصطفیٰ کمال نے کہا کہ گورنر سندھ صوبہ کے عوام کی احسن انداز میں خدمت کررہے ہیں۔

یہ بھی پڑھیں؛ کراچی کو مجرموں کا شہر نہیں بننے دیں گے، کامران ٹیسوری

ایم کیو ایم رہنما نے مزید کہا کہ سرسبز و شاداب کراچی کا خواب ان کی کاوشوں کی بدولت جلد پایہ تکمیل کو پہنچے گا۔