اسلام آباد: صدر مملکت ڈاکٹر عارف علوی نے انتہا پسندی کی حوصلہ شکنی اور سماجی اصلاح میں کردار ادا کرنے کیلئے علمائے کرام پر زور دیا ہے۔

تفصیلات کے مطابق صدر عارف علوی سے علماء مشائخ یکجہتی کونسل آف پاکستان کے وفد کی ملاقات ہوئی ہے۔

اس موقع پر صدر مملکت نے انتہا پسندی کی حوصلہ شکنی اور سماجی اصلاح میں کردار ادا کرنے کیلئے علمائے کرام پر زور دیتے ہوئے کہا کہ ملک کے علمائے کرام و مشائخ مثبت سماجی تبدیلی لانے کیلئے اپنا کردار ادا کریں۔

علماء اخلاقی اقدار اور وسائل کی بچت کے فروغ میں اپنا کردار ادا کریں

عارف علوی نے ملاقات میں گفتگو کرتے ہوئے کہا کہ معاشرے میں انتہا پسندی، دہشت گردی اور فرقہ واریت کی حوصلہ شکنی کرنے کی ضرورت ہے، علماء اخلاقی اقدار اور وسائل کی بچت کے فروغ میں اپنا کردار ادا کریں۔

انہوں نے کہا کہ علمائے کرام قومی یکجہتی، مذہبی رواداری، اور بین المذاہب ہم آہنگی اور امن کو فروغ دیں۔ علماء قرآن، سنت اور احادیث نبوی ﷺ کی روشنی میں اسلام کی حقیقی تعلیمات اجاگر کرکے انتہا پسندی، دہشت گردی اور فرقہ واریت کے خاتمے کے لیے اپنا کردار ادا کریں۔

علمائے کرام کو معاشرے سے تفریق دور کرنے کیلئے ٹھوس کوششیں کرنی چاہئیں

صدر مملکت نے کہا کہ پاکستان میں دہشت گردی اور عسکریت پسندی کے خاتمے کیلئے انسداد انتہا پسندی اور انسداد دہشت گردی کے شعبوں میں علمائے کرام کی جانب سے مشترکہ کوششوں کی ضرورت ہے۔

انکا کہنا ہے کہ مذہبی اسکالرز کی ذمہ داری ہے کہ وہ اسلام کی حقیقی تعلیمات کو لوگوں بالخصوص ملک کے نوجوانوں میں عام کریں اور علمائے کرام سماجی اصلاحات لائیں، معاشرے میں نیکی اور اخلاقیات کو فروغ دیں۔

مزید پرھیں: صدر مملکت کی سویڈن میں قرآن پاک کی بےحرمتی کے گھناؤنے فعل کی مذمت

عارف علوی نے کہا کہ پاکستان نظم و ضبط، استقامت، اخلاقی راستبازی اور سماجی انصاف کو فروغ دے کر ترقی کر سکتا ہے، علمائے کرام کو معاشرے سے تفریق دور کرنے کیلئے ٹھوس کوششیں کرنی چاہئیں۔

علمائے کرام ملک کے اندر اتحاد ویکجہتی کو فروغ دیں

انہوں نے کہا کہ علمائے کرام ملک کے اندر اتحاد و یکجہتی کو فروغ دیں، نوجوانوں کو رواداری، عفو و درگزر اور امن کی تعلیم دی جائے۔

صدر مملکت نے مزید کہا کہ اسلام نے وسائل کے ضیاع سے گریز کرنے پر زور دیا، علمائے کرام مساجد میں خطبات جمعہ کے ذریعے قومی وسائل، ایندھن اور توانائی کے پرُاعتدال، ذمہ دارانہ اور پائیدار استعمال کو فروغ دینے میں مدد کریں۔