وزیر خارجہ بلاول بھٹو زرداری نے کہا ہے کہ آئی ایم ایف کیساتھ مذاکرات کی کامیابی سے پاکستانی معیشت کی صورتحال بہتر ہوگی۔

وفاقی وزیر بلاول بھٹو نے ڈونر کانفرنس سے خطاب کرتے ہوئے کہا کہ معیشت مشکل دور سے گزر رہی ہے، ملک میں شدید معاشی اور سیاسی بحران ہے۔

وزیر خارجہ نے کہا کہ وزیر خزانہ اس وقت آئی ایم ایف سے بات چیت کررہے ہیں، امید ہے مذاکرات کامیاب ہونگے، مذاکرات کی کامیابی سے پاکستانی معیشت کی صورتحال بہتر ہوگی، امید ہے ملک کی معاشی ضروریات پوری ہوں گی۔

سیلاب نے زراعت کو مکمل تباہ کردیا

انہوں نے کہا کہ گزشتہ برس جون میں مون سون میں بارشیں ہوئیں اور سیلاب آیا، سیلاب ہمارے لئے قیامت سے پہلے قیامت تھا۔ پاکستان کا بڑا حصہ سیلاب سے متاثر تھا، سیلاب نے زراعت کو سندھ اور پنجاب میں مکمل تباہ کردیا، اس مشکل گھڑی میں یونائیٹڈ نیشن نے ساتھ دیا۔

بلاول بھٹو نے کہا کہ جنیوا میں کانفرنس کا انعقاد کیا گیا اور سیلاب سے متاثرہ علاقوں کے لئے تعاون کا یقین دلایا، ہمیں کہہ جاتا تھا کہ پوری دنیا میں معاشی بحران ہے۔

انکا کہنا ہے کہ ہماری خارجہ پالیسی کی سب سے بڑی کامیابی ہے اس ماحول میں پاکستان نے جو دنیا سے مانگا اس سے زیادہ ہم سے وعدے کیے گئے، ہمارے مطالبہ تھا کہ دوبارہ تعمیرات کی جائیں، اس سلسلے میں سب سے آگے ورلڈ بینک سے تعاون کیا۔

وفاقی وزیر نے کہا کہ جنیوا کانفرنس کے بعد ہم نے آج فیصلہ کیا ہے گھروں کو تعمیر کرنا ہے، ان علاقوں میں اسپتالوں اور اسکولوں کو تعمیر کرنا ہے۔

اتنی بڑی تباہی پہلے کبھی نہیں ہوئی

انہوں نے کہا کہ سیلاب نے شدید بارشوں کے باعث سندھ صوبہ 100 کلومیٹر طویل جھیل بن گیا، یہ سیلاب قیامت سے پہلے قیامت تھا، یہ پورے ملک، پورے سندھ کیلئے بڑی تباہ کاری تھی، اتنی بڑی تباہی پہلے کبھی نہیں ہوئی۔

بلاول بھٹو نے کہا کہ انگریزوں کے زمانے سے لے کر اب تک یہ سب سے بڑی تباہی تھی، پانچ سو ایکڑ پر کھڑی فصلیں مکمل تباہ ہوچکی ہیں، سیلاب کی تباہیوں سے ملک کی معیشت پر بھی خراب اثرات پڑے۔

وزیر خارجہ کا یو این سیکریٹری جنرل کا شکریہ

وزیر خارجہ نے کہا کہ میں یو این سیکریٹری جنرل کا بہت شکرگزار ہوں جنھوں نے اپنا وقت نکالا اور پاکستان آئے، سیکریٹری جنرل نے تباہ کاریوں کے مناظر کا خود معائنہ کیا اور عالمی سپورٹ کیلئے اپیل کی، ان کی اپیل کے بعد پوری دنیا اور ادارے مدد کیلئے آگے آئے۔

انکا کہنا ہے کہ اس وقت ورلڈ بینک کا شکر گزار ہوں صفہ اول کا کردار ادا کیا ہے، ہم نے فیصلہ کیا تھا جن لوگوں کے گھر برباد ہوئے ہیں انکی تعمیر کرنی ہے، ورلڈ بینک نے سیلاب سے متاثرہ علاقوں کے لئے 2 ارب ڈالرز منظور کروائے۔

بلاول بھٹو نے کہا کہ اب دیگر ادارے بھی پیپلز پاؤسنگ کے لئے آگے آرہے ہیں، ہمیں 1.5 ارب ڈالرز گھروں کی تعمیر کے لئے ضرورت ہے۔

انہوں نے کہا کہ وزیراعظم نے سی ایم کو یقین دھانی کرائی ہے کہ وفاق کی جانب سے جو حصہ بنتا ہے اسے فراہم کرینگے اورسیلاب سے متاثرہ افراد کو مالکانہ حقوق بھی دینگے۔

ہم بہت سے منصوبوں پر کام کررہے ہیں

وفاقی وزیر نے کہا کہ ہم بہت سے منصوبوں پر کام کررہے ہیں، ہمارے سامنے مسئلے بہت بڑے ہیں مشکلات بہت ہیں پاکستان کی تاریخ میں ایسی مشکل نہیں آئی، تعلیمی اور صحت کے بہت مسائل ہیں بہت ضروری ہے اسلام آباد کو سمجھائیں۔

انکا کہنا ہے کہ ہم بہت پریشانی سے گزر رہے ہیں، سندھ میں تعلیمی بحران بھی ہے اور تقریباً 47 فیصد تعلیمی انفرا اسٹرکچر تباہ ہوگیا ہے۔ میں سمجھتا ہوں صرف زراعت نہیں بلکہ بہت سے علاقوں میں بھوک اور بے روزگاری کے مسائل ہیں۔

بلاول بھٹو نے مزید کہا کہ میں اسلام آباد کو سمجھانا چاہتا ہوں سیلاب متاثرین کی آباد کاری پہلی ترجیح ہے، بین الاقوامی ادارے معیشت کے ساتھ ساتھ سیلاب سے متاثرہ علاقوں اور افراد کے لئے اپنا بھر پور کردار ادا کریں۔