خیبرپختونخوا کا انتخابی شیڈول جاری نہ کرنے پر الیکشن کمیشن آف پاکستان کو قانونی نوٹس بھجوادیا گیا ہے۔

تفصیلات کے مطابق الیکشن کمیشن کو قانونی نوٹس جوڈیشل ایکٹوازم پینل کے سربراہ اظہر صدیق نے بھجوایا۔

خط کے متن میں بتایا گیا کہ خیبرپختونخوا کے گورنر حاجی غلام علی نے الیکشن کمیشن کو انتخابی شیڈول کے لئے خط لکھا، گورنر کے خط کے باوجود الیکشن کمیشن نے انتخابی شیڈول جاری نہیں کیا، نوے دن میں انتخابات آئینی تقاضا اور بنیادی حق ہے۔

خط کے متن کے مطابق سیاسی انصاف آئین کی اساس ہے، شفاف انتخابات کے لئے انتخابی شیڈول کا اجراء جمہوری اساس ہے۔

خط میں واضح کیا گیا کہ آئین کے آرٹیکل 105 کے برعکس الیکشن کمیشن بدنیتی کی بناء پر انتخابی شیڈول جاری نہیں کررہا، انتخابی شیڈول میں تاخیر کر کے الیکشن کمیشن آئین کی خلاف ورزی کے مرتکب ہورہا ہے۔

خط میں مزید بتایا گیا کہ اگر لیگل نوٹس کے باوجود انتخابی شیڈول جاری نہ کیا گیا تو قانونی چارہ جوئی کے لئے عدلیہ سے رجوع کیا جائے گا۔

انتخابات کی تاریخ کا اعلان مشاورت کے بعد کیا جائے گا، گورنر کے پی کا الیکشن کمیشن کو جواب

گزشتہ روز گورنر خیبرپختونخوا کی جانب سے الیکشن کمیشن آف پاکستان کے خط کا جواب دیا گیا تھا جس میں انتخابات کی تاریخ کے متعلق بات کی گئی۔

انہوں نے اپنے خط میں سوال اٹھاتے ہوئے کہا تھا کہ الیکشن کمیشن اس بات کا تعین کرے کیا اب حالات میں الیکشن ممکن ہیں؟ تاہم سیاسی جماعتوں اور سیکیورٹی اداروں سے مشاورت کے بعد الیکشن کی تاریخ کا اعلان کیا جائے گا۔

گورنر خیبرپختونخوا نے کہا کہ حالیہ دہشتگردی کے واقعات کے بعد صوبے میں الارمنگ صورتحال ہے اور ہدایت کی ہے کہ الیکشن کمیشن اس معاملے پر قانون نافذ کرنے والے اداروں سے مشاورت کرے۔

 اس سے قبل الیکشن کمیشن آف پاکستان کی جانب سے انتخابات کی تاریخ کیلئے گورنر پنجاب اور گورنر خیبرپختونخوا کو ایک بار پھر خط لکھا گیا تھا۔

خط میں کہا گیا تھا کہ پنجاب اسمبلی 14 جنوری کو تحلیل ہوئی تھی اور جبکہ خیبرپختونخوا اسمبلی 18 جنوری کو تحلیل ہوئی تاہم دونوں گورنر کی جانب سے تاحال الیکشن کی تاریخ نہیں دی گئی ہے۔

خط کے مطابق الیکشن کمیشن نے کہا ہے کہ آرٹیکل 105 کے تحت تحلیل کی صورت میں گورنرکا الیکشن کی تاریخ دینا ضروری ہے۔

یہ بھی پڑھیں: صوبائی اسمبلیوں کی تحلیل پر الیکشن کب اور کتنی نشستوں پر ہونگے؟